ദുബൈ: ലോകത്തിലെ ഏറ്റവും സമ്പന്നമായ 20 നഗരങ്ങളുടെ പട്ടികയില്‍ ദുബൈയും. ഇപ്പോള്‍ 81,200 കോടീശ്വരന്മാരാണ് ദുബൈയില്‍ താമസിക്കുന്നത്. ഇതില്‍ 237 പേര്‍ സെന്റി-മില്യണയര്‍മാരാണ് (100 മില്യണ്‍ ഡോളറില്‍ കൂടുതല്‍ സമ്പത്തുള്ളവര്‍). 20 പേര്‍ ശതകോടീശ്വരന്മാരുമാണ്.

ഹെന്‍ലി & പാര്‍ട്‌ണേഴ്സ് ന്യൂ വേള്‍ഡ് വെല്‍ത്തുമായി സഹകരിച്ച് പുറത്തിറക്കിയ ലോകത്തിലെ ഏറ്റവും സമ്പന്നമായ നഗരങ്ങളുടെ പട്ടികയില്‍ പതിനെട്ടാം സ്ഥാനത്താണ് ദുബൈ. നഗരത്തില്‍ താമസിക്കുന്ന സമ്പന്നരുടെ എണ്ണത്തില്‍ മൂന്ന് സ്ഥാനങ്ങള്‍ കയറി ആഗോളതലത്തില്‍ 18-ാം സ്ഥാനത്താണ് നിലവില്‍ ദുബൈ.

നിക്ഷേപത്തിനും ബിസിനസ്സിനുനുള്ള ഒരു ആഗോള കേന്ദ്രമെന്ന നിലയിലുള്ള ദുബൈയുടെ തുടര്‍ച്ചയായ വളര്‍ച്ചയെയാണ് റിപ്പോര്‍ട്ട് അടിവരയിടുന്നത്.  

ലോകത്തിലെ ഏറ്റവും സമ്പന്നമായ അറബ് നഗരങ്ങളുടെ പട്ടികയില്‍ ഒന്നാം സ്ഥാനത്താണ് ദുബൈ. 2025-ലെ ലോകത്തിലെ ഏറ്റവും സമ്പന്നമായ നഗരങ്ങളുടെ പട്ടികയില്‍ ദുബൈ 21-ാം സ്ഥാനത്തുനിന്നാണ് 18-ാം സ്ഥാനത്തേക്ക് ഉയര്‍ന്നത്.

കഴിഞ്ഞ ദശകത്തില്‍, നഗരം കോടീശ്വരന്മാരുടെ എണ്ണത്തില്‍ 102 ശതമാനം വളര്‍ച്ചയാണ് രേഖപ്പെടുത്തിയത്. ഉയര്‍ന്ന ആസ്തിയുള്ള വ്യക്തികളെ ആകര്‍ഷിക്കുന്നതില്‍ ലോകത്തിലെ ഏറ്റവും വേഗത്തില്‍ വളരുന്ന മൂന്നാമത്തെ നഗരമാണ് ദുബൈ. ഇക്കാര്യത്തില്‍ ഷെന്‍ഷെനും ഹാങ്ഷൗവും മാത്രമാണ് ദുബൈക്ക് മുന്നിലുള്ളത്.

ഒരു വര്‍ഷം കൊണ്ടുമാത്രം 8,700 പുതിയ കോടീശ്വരന്മാരെയാണ് ദുബൈ ആകര്‍ഷിച്ചത്. ഇതോടെ 2024 അവസാനത്തോടെ നഗരത്തിലെ മൊത്തം കോടീശ്വരന്മാരുടെ എണ്ണം 81,200 ആയി. 2023ല്‍ ഇത് 72,500 ആയിരുന്നു.

2024 അവസാനത്തോടെ ദുബൈയിലെ അതിസമ്പന്നരുടെ എണ്ണം (100 മില്യണ്‍ ഡോളറില്‍ കൂടുതല്‍ ആസ്തിയുള്ളവര്‍) 237 ആയി ഉയര്‍ന്നു. 2023ല്‍ ഇത് 212 ആയിരുന്നു. ഇത് ആഗോള സാമ്പത്തിക കേന്ദ്രമെന്ന നിലയില്‍ എമിറേറ്റിന്റെ വര്‍ധിച്ചുവരുന്ന പ്രാധാന്യത്തെയാണ് സൂചിപ്പിക്കുന്നത്.

അതേസമയം, കഴിഞ്ഞ ദശകത്തില്‍ അബൂദബിയിലെ കോടീശ്വരന്മാരുടെ എണ്ണത്തില്‍ ഗണ്യമായ വര്‍ധനവ് ഉണ്ടായിട്ടുണ്ട്. 2014നും 2024നും ഇടയില്‍, തലസ്ഥാനത്ത് കോടീശ്വരന്മാരുടെ എണ്ണത്തില്‍ 80 ശതമാനം വര്‍ധനവാണ് രേഖപ്പെടുത്തിയത്. 2024 അവസാനത്തോടെ ഇത് 17,800 ആയി.

അബൂദബി ഇപ്പോള്‍ ഏകദേശം 75 സെന്റി-മില്യണയര്‍മാരുടെയും (100 മില്യണ്‍ ഡോളറില്‍ കൂടുതല്‍ ആസ്തിയുള്ള വ്യക്തികള്‍) 8 ശതകോടീശ്വരന്മാരുടെയും ആസ്ഥാനമാണ്. ബിസിനസ്സിന്റെയും നിക്ഷേപത്തിന്റെയും കേന്ദ്രമെന്ന നിലയില്‍ എമിറേറ്റിന്റെ വര്‍ധിച്ചുവരുന്ന പ്രാധാന്യത്തെയാണ് ഇത് അടിവരയിടുന്നത്.

അനുകൂലമായ നികുതി വ്യവസ്ഥകള്‍, ശക്തമായ അടിസ്ഥാന സൗകര്യങ്ങള്‍, അന്താരാഷ്ട്ര നിക്ഷേപകരെയും ആകര്‍ഷിക്കാന്‍ ലക്ഷ്യമിട്ടുള്ള സാമ്പത്തിക പരിഷ്‌കാരങ്ങള്‍ എന്നിവയാല്‍ ദുബൈയും അബൂദബിയും ആഗോള സാമ്പത്തിക കേന്ദ്രങ്ങള്‍ എന്ന നിലയില്‍ തങ്ങളുടെ സ്ഥാനങ്ങള്‍ ശക്തിപ്പെടുത്തുന്നതിനാല്‍ മിഡില്‍ ഈസ്റ്റിന്റെ സാമ്പത്തിക ഭൂപടത്തിലെ വിശാലമായ മാറ്റത്തെയാണ് ഈ കുതിച്ചുചാട്ടം പ്രതിഫലിപ്പിക്കുന്നത്.