അബൂദബി: യുഎഇയിലെ പുതിയ ഗതാഗത നിയമങ്ങള്‍ പ്രകാരം അശ്രദ്ധമായി വാഹനമോടിക്കുന്നവരെ ഇനി സംഭവസ്ഥലത്ത് തന്നെ അറസ്റ്റ് ചെയ്യുന്നതായിരിക്കും, കൂടാതെ ഇവരില്‍ നിന്ന് ഒരു ലക്ഷം ദിര്‍ഹം വരെ പിഴ ഈടാക്കുകയും ചെയ്യും. യുഎഇ ഗതാഗത നിയമത്തിലെ പുതിയ പരിഷ്‌കാരങ്ങള്‍ റോഡ് സുരക്ഷയെക്കുറിച്ചുള്ള വര്‍ദ്ധിച്ചുവരുന്ന ആശങ്കകള്‍ പരിഹരിക്കാനായി രൂപകല്‍പ്പന ചെയ്തിട്ടുള്ളതാണ്.

 

 

ആഭ്യന്തര മന്ത്രാലയത്തിന്റെ കണക്കുകള്‍ പ്രകാരം, 2024ല്‍ യുഎഇയില്‍ യാത്രക്കാരുടെ 'ജീവനും സുരക്ഷയും അപകടത്തിലാക്കുന്ന തരത്തില്‍ വാഹനമോടിച്ചതിന്' 4,291 നിയമലംഘനങ്ങള്‍ റിപ്പോര്‍ട്ട് ചെയ്തിട്ടുണ്ട്. ഏറ്റവും കൂടുതല്‍ നിയമലംഘനങ്ങള്‍ നടന്നത് ദുബൈയിലാണ്(2,765 കേസുകള്‍). 

 

 

പുതുതായി ഭേദഗതി ചെയ്ത ഗതാഗത നിയമപ്രകാരം, താഴെപ്പറയുന്ന ആറ് കുറ്റകൃത്യങ്ങളില്‍ ഏതെങ്കിലും ഒരു കുറ്റത്തിന് ഡ്രൈവര്‍മാരെ സംഭവസ്ഥലത്തുവെച്ചുതന്നെ അറസ്റ്റ് ചെയ്യാന്‍ ട്രാഫിക് എന്‍ഫോഴ്സ്മെന്റ് ഉദ്യോഗസ്ഥര്‍ക്കും പൊലിസിനും അധികാരമുണ്ട്.

 

1) മരണമോ, പരുക്കോ സംഭവിക്കാവുന്ന അപകടമുണ്ടാക്കിയാല്‍.

 

2) അശ്രദ്ധമായ ഡ്രൈവിംഗ് മൂലം ഗണ്യമായ നാശനഷ്ടങ്ങള്‍ ഉണ്ടാക്കിയാല്‍

 

3) പൊതു സുരക്ഷയെ ബാധിക്കുന്ന അശ്രദ്ധമായ ഡ്രൈവിംഗ്.

 

4) ലഹരി പദാര്‍ത്ഥങ്ങള്‍ ഉപയോഗിച്ച് വാഹനമോടിക്കല്‍

 

5) സുരക്ഷാ ഉദ്യോഗസ്ഥര്‍ക്ക് തിരിച്ചറിയല്‍ രേഖകള്‍ നല്‍കാന്‍ വിസമ്മതിക്കുകയോ തെറ്റായ വിവരങ്ങള്‍ നല്‍കുകയോ ചെയ്താല്‍

 

6) അപകടസ്ഥലത്ത് നിന്ന് മുങ്ങുക, ഉദ്യോഗസ്ഥരുടെ ഉത്തരവ് അനുസരിക്കാതിരിക്കുക.

 

 

പുതിയ ഭേദഗതി പ്രകാരം അശ്രദ്ധമായ ഡ്രൈവിംഗ് മരണത്തിന് കാരണമായാല്‍ ഡ്രൈവര്‍മാര്‍ക്ക് തടവും 50,000 ദിര്‍ഹത്തില്‍ കുറയാത്ത പിഴയും നേരിടേണ്ടിവരും. റെഡ് സിഗ്‌നല്‍ ലംഘനം, മദ്യപിച്ച് വാഹനമോടിക്കല്‍, റദ്ദാക്കിയ ലൈസന്‍സ് ഉപയോഗിച്ച് വാഹനമോടിക്കല്‍, എന്നിവയാണ് മരണകാരണമെങ്കില്‍ ശിക്ഷകള്‍ കൂടുതല്‍ കര്‍ശനമാണ്. കുറഞ്ഞത് ഒരു വര്‍ഷം തടവും 100,000 ദിര്‍ഹം വരെ പിഴയും ലഭിക്കും.

 

അശ്രദ്ധമായ ഡ്രൈവിംഗിലൂടെയുണ്ടാകുന്ന അപകടങ്ങള്‍ക്ക് 2,000 ദിര്‍ഹം വരെ പിഴയും, 23 ബ്ലാക്ക് പോയിന്റുകളും, 60 ദിവസത്തേക്ക് വാഹനം കണ്ടുകെട്ടലും ലഭിക്കും. മൂന്ന് മാസത്തിനുള്ളില്‍ 50,000 ദിര്‍ഹം പിഴയടച്ച് വാഹനം റിലീസ് ചെയ്തില്ലെങ്കില്‍ വാഹനം ലേലം ചെയ്യും. അപകടസ്ഥലത്ത് നിന്ന് മുങ്ങുന്നവര്‍ക്ക് ഒരു വര്‍ഷം വരെ തടവും അല്ലെങ്കില്‍ 50,000 ദിര്‍ഹം മുതല്‍ 100,000 ദിര്‍ഹം വരെ പിഴയും ലഭിക്കും.