ഷാര്‍ജ: ഷാര്‍ജയിലെ അല്‍ നഹ്ദ പ്രദേശത്തെ ഒരു ബഹുനില കെട്ടിടത്തില്‍ ഉണ്ടായ തീപിടുത്തത്തില്‍ നാല് പേര്‍ മരിക്കുകയും നിരവധി പേര്‍ക്ക് പരുക്കേല്‍ക്കുകയും ചെയ്തതായി അധികൃതര്‍ സ്ഥിരീകരിച്ചു.

തീപിടുത്തത്തില്‍ നിന്ന് രക്ഷപ്പെടാന്‍ 44-ാം നിലയില്‍ നിന്ന് ചാടിയ ഒരാളും മരിച്ചവരില്‍ ഉള്‍പ്പെടുന്നു. കുറഞ്ഞത് ആറ് പേര്‍ക്ക് പരുക്കേല്‍ക്കുകയോ പുക ശ്വസിക്കുകയോ ചെയ്തുവെന്നും ഇവര്‍ നിലവില്‍ ആശുപത്രിയില്‍ ചികിത്സയിലാണെന്നും അധികൃതര്‍ കൂട്ടിച്ചേര്‍ത്തു.

രാവിലെ 11:31 ന് അടിയന്തര കോള്‍ ലഭിച്ചതായും ഉടന്‍ തന്നെ പ്രതികരിച്ചതായും ഷാര്‍ജ സിവില്‍ ഡിഫന്‍സ് അറിയിച്ചു. സമീപത്തുള്ള സ്റ്റേഷനുകളില്‍ നിന്ന് അഗ്‌നിശമന സേനാംഗങ്ങളെ അയച്ചതായും സംഭവസ്ഥലത്ത് എത്തിയ ഉടന്‍ രക്ഷാപ്രവര്‍ത്തനം ആരംഭിച്ചതായും അധികൃതര്‍ പറഞ്ഞു.

ടവറിന്റെ മുകളിലത്തെ നിലകളില്‍ ഉണ്ടായ തീപിടുത്തത്തെത്തുടര്‍ന്ന് താമസക്കാരെ വേഗത്തില്‍ ഒഴിപ്പിച്ചു. തീ നിയന്ത്രണവിധേയമാക്കുന്നതിനും കൂടുതല്‍ നാശനഷ്ടങ്ങള്‍ തടയുന്നതിനും അഗ്‌നിശമന സേനാംഗങ്ങള്‍ ഒരേസമയം പ്രവര്‍ത്തിച്ചു. പ്രദേശം സുരക്ഷിതമാക്കുന്നതിനും ഗതാഗതം നിയന്ത്രിക്കുന്നതിനും പൊലിസ് പട്രോളിംഗ് സംഘത്തെയും വിന്യസിച്ചിരുന്നു.

തീപിടിത്തത്തിന്റെ കാരണം കണ്ടെത്തുന്നതിനും കെട്ടിടം സുരക്ഷാ ചട്ടങ്ങള്‍ പാലിച്ചിട്ടുണ്ടോ എന്ന് വിലയിരുത്തുന്നതിനുമായി അധികൃതര്‍ അന്വേഷണം ആരംഭിച്ചു.

A devastating fire broke out in a high-rise building in Sharjah, claiming four lives and leaving several others injured. Emergency services rushed to the scene for rescue operations.