ബി.ജെ.പി ഭരിക്കുന്ന ഉത്തരാഖണ്ഡില്‍ 170 മദ്‌റസകള്‍ കൂടി അടച്ചുപൂട്ടി മുദ്രവച്ചു. മദ്‌റസകള്‍ പ്രവര്‍ത്തിക്കുന്നത് നിയമപരമല്ലെന്ന് ആരോപിച്ചാണ് വ്യാപക അടച്ചുപൂട്ടല്‍. ഡെറാഡൂണ്‍, ഹരിദ്വാര്‍, ഉദ്ദം സിങ് നഗര്‍, ഹല്‍ദ്വാനി എന്നിവിടങ്ങളിലെ മദ്‌റസകളാണ് പ്രധാനമായും പൂട്ടിയത്.

 സംസ്ഥാന മദ്‌റസ ബോര്‍ഡിലോ വിദ്യാഭ്യാസ വകുപ്പിലോ രജിസ്റ്റര്‍ ചെയ്യാത്തവയാണ് പൂട്ടിയതെന്നാണ് സര്‍ക്കാര്‍ പറയുന്നത്. ചരിത്രപരമായ നീക്കമെന്നാണ് നടപടിയെ മുഖ്യമന്ത്രി പുഷ്‌കര്‍ സിങ് ധാമി വിശേഷിപ്പിച്ചത്. മദ്‌റസകള്‍ നിയമ വിരുദ്ധമാണെന്ന് പറഞ്ഞ ധാമി, ഇത്തരത്തിലുള്ള സ്ഥാപനങ്ങള്‍ പ്രോത്സാഹിപ്പിക്കില്ലെന്നും പറഞ്ഞു. വിദ്യാഭ്യാസത്തിന്റെ പേരില്‍ കുട്ടികളെ തീവ്രവാദത്തിലേക്ക് നയിക്കുന്ന സ്ഥാപനങ്ങളാണ് മദ്‌റസകളെന്നും ധാമി ആരോപിച്ചു.

സംസ്ഥാനത്ത് പുഷ്‌കര്‍ സിങ് ധാമിയുടെ നേതൃത്വത്തിലുള്ള ബി.ജെ.പി സര്‍ക്കാര്‍ അധികാരത്തിലേറിയതിന് പിന്നാലെ തുടങ്ങിയ മുസ്‍ലിം വിരുദ്ധ നീക്കങ്ങളുടെ തുടര്‍ച്ചയാണ് ഇപ്പോഴത്തെ നടപടികളെന്നാണ് ആക്ഷേപം.