ഭിവാനി: കാമുകനുമായി ചേര്‍ന്ന് ഭര്‍ത്താവിനെ ശ്വാസം മുട്ടിച്ചു കൊന്ന ശേഷം അഴുക്കുചാലില്‍ തള്ളിയ ഭാര്യ പൊലിസ് പിടിയില്‍. യൂട്യൂബറായ രവീണയും കാമുകന്‍ സുരേഷം ചേര്‍ന്ന് ഭര്‍ത്താവ് പ്രവീണിനെ കഴുത്തുഞെരിച്ചു കൊല്ലുകയായിരുന്നു. മാര്‍ച്ച് 25നാണ് സംഭവം നടന്നത്. 

2017ലാണ് ഡ്രൈവറായ പ്രവീണ്‍ രവീണയെ വിവാഹം കഴിച്ചത്. ദമ്പതികള്‍ക്ക് ആറ് വയസ്സുള്ള മകനുണ്ട്. ഒരു യൂട്യൂബര്‍ എന്ന നിലയില്‍ രവീണയുടെ വര്‍ധിച്ചുവരുന്ന സോഷ്യല്‍ മീഡിയ ഉപയോഗത്തെച്ചൊല്ലി ഇവര്‍ തമ്മില്‍ നിരന്തരം വഴക്കുകള്‍ ഉണ്ടായിരുന്നു.

ഏകദേശം ഒന്നര വര്‍ഷം മുമ്പാണ് ഹിസാറിലെ പ്രേംനഗറില്‍ നിന്നുള്ള മറ്റൊരു യൂട്യൂബര്‍ സുരേഷിനെ ഇന്‍സ്റ്റാഗ്രാമിലൂടെ രവീണ പരിചയപ്പെട്ടത്. വെര്‍ച്വല്‍ സൗഹൃദമായി ആരംഭിച്ച സൗഹൃദം താമസിയാതെ യഥാര്‍ത്ഥ ബന്ധമായി മാറിയെന്ന് ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു.

പൊലിസ് പറയുന്നതനുസരിച്ച്, മാര്‍ച്ച് 25ന് രാത്രി പ്രവീണ്‍ വീട്ടിലെത്തിയപ്പോള്‍ രവീണയേയും സുരേഷിനേയും ഒരുമിച്ച് കണ്ടു. ഇതില്‍ കുപിതനായ പ്രവീണ്‍ രവീണയെ വഴക്കു പറഞ്ഞു. ഇതോടെ രവീണയും കാമുകനും ചേര്‍ന്ന് പ്രവീണിനെ കൊല്ലാന്‍ തീരുമാനിക്കുകയായിരുന്നു

കഴുത്തുഞെരിച്ചു കൊന്ന ശേഷം പ്രവീണിന്റെ മൃതദേഹം ഒരു മോട്ടോര്‍ സൈക്കിളില്‍ കയറ്റി ഭിവാനിയിലെ ദിനോദ് റോഡിലെ ഒരു അഴുക്കുചാലില്‍ ഉപേക്ഷിക്കുകയായിരുന്നു. 

മൂന്ന് ദിവസത്തിന് ശേഷം, പൊലിസും പ്രവീണിന്റെ കുടുംബവും സംയുക്തമായി നടത്തിയ തിരച്ചിലിലാണ് അഴുകിത്തുടങ്ങിയ മൃതദേഹം അഴുക്കുചാലില്‍ നിന്ന് കണ്ടെടുത്തത്.