കൊല്‍ക്കത്ത: പ്രധാനമന്ത്രി നരേന്ദ്ര മോദിയെയും ബിജെപിയെയും പരിഹസിച്ച് പശ്ചിമ ബംഗാള്‍ മുഖ്യമന്ത്രി മമത ബാനര്‍ജി. ബിജെപി ഇവിടെ മുസ്‌ലിംകള്‍ക്ക് എതിരാണെന്നും എന്നാല്‍ പശ്ചിമേഷ്യന്‍ രാജ്യങ്ങളില്‍ എത്തിയാല്‍ അവര്‍ മുസ്‌ലിംകളുടെ ആതിഥേയത്വം സ്വീകരിക്കുമെന്നും മമത പറഞ്ഞു.

'നിങ്ങള്‍ മുസ്‌ലിംകള്‍ക്ക് എതിരാണ്, പക്ഷേ നിങ്ങള്‍ ദുബൈയിലോ യുഎഇയിലോ പോയാല്‍, അവിടെ ആരുടെ ആതിഥ്യമര്യാദയാണ് നിങ്ങള്‍ സ്വീകരിക്കുന്നത്? നിങ്ങള്‍ നിങ്ങളുടെ രാജ്യത്ത് ഒരു കാര്യവും പുറത്ത് മറ്റൊരു കാര്യവും പറയുന്നു,' മുസ്‌ലിം പുരോഹിതന്മാരുമായുള്ള ഒരു യോഗത്തിനിടെ മമതാ ബാനര്‍ജി പറഞ്ഞു.

പ്രതിപക്ഷത്തിന്റെ ശക്തമായ എതിര്‍പ്പുകള്‍ക്കും പ്രതിഷേധങ്ങള്‍ക്കും കാരണമായ വഖ്ഫ് ഭേദഗതി നിയമത്തിനെതിരെ 'ഐക്യത്തോടെ നില്‍ക്കാനും ഒരുമിച്ച് പോരാടാനും' അവര്‍ ഇന്ത്യാ മുന്നണിയോട് അഭ്യര്‍ത്ഥിച്ചു.

'ഇന്ത്യന്‍ മുന്നണിയോട് ഞാന്‍ അഭ്യര്‍ത്ഥിക്കുകയാണ്, നമുക്ക് ഐക്യത്തോടെ നില്‍ക്കാം, ധൈര്യത്തോടെ ഒരുമിച്ച് പോരാടാം. ഇത് വ്യക്തിപരമായ കാര്യമല്ല, ഇത് എല്ലാവരെയും ബാധിക്കുന്നതാണ്. ഇന്ന്, ഇത് നിങ്ങള്‍ക്കെതിരെയാണ് സംഭവിക്കുന്നത്. നാളെ, ഇത് മറ്റൊരാള്‍ക്കെതിരെയായിരിക്കും. ഇപ്പോള്‍ അവര്‍ യുസിസിയും കൊണ്ടുവരാന്‍ ആഗ്രഹിക്കുന്നു,' മമത കൂട്ടിച്ചേര്‍ത്തു.

നേരത്തേ മുര്‍ഷിദാബാദിലുണ്ടായ കലാപത്തില്‍ മമത ബിജെപിയെ കുറ്റപ്പെടുത്തിയിരുന്നു. മുര്‍ഷിദാബാദില്‍ സംഘര്‍ഷാവസ്ഥ നിലനില്‍ക്കുന്നതിനിടെയാണ് മമത ബാനര്‍ജിയുടെ പരാമര്‍ശം. അക്രമ സംഭവങ്ങള്‍ അന്വേഷിക്കാന്‍ സംസ്ഥാന പൊലിസ് പ്രത്യേക അന്വേഷണ സംഘം രൂപീകരിച്ചു.

പി.ടി.ഐ റിപ്പോര്‍ട്ട് അനുസരിച്ച്, ഒരു അഡീഷണല്‍ സൂപ്രണ്ട് ഓഫ് പൊലിസ്, രണ്ട് ഡെപ്യൂട്ടി സൂപ്രണ്ടുമാര്‍, അഞ്ച് ഇന്‍സ്‌പെക്ടര്‍മാര്‍ (സി.ഐ.ഡിയില്‍ നിന്നുള്ള നാല് പേരും ട്രാഫിക് പൊലിസില്‍ നിന്നുള്ള ഒരാളും ഉള്‍പ്പെടെ), സുന്ദര്‍ബന്‍ ജില്ലയ്ക്ക് കീഴിലുള്ള സൈബര്‍ ക്രൈം പൊലിസ് സ്റ്റേഷനിലെ എസ്എച്ച്ഓ എന്നിവരാണ് എസ്‌ഐടിയിലെ അംഗങ്ങള്‍.

West Bengal CM Mamata Banerjee criticizes PM Modi and the BJP, accusing them of hypocrisy for opposing Muslims in India while embracing hospitality from the UAE during foreign visits.