മലപ്പുറം: സംസ്ഥാനത്ത് രണ്ടിടത്തു നടന്ന അപകടങ്ങളില്‍ രണ്ടുപേര്‍ മരിച്ചു. മലപ്പുറത്തും പത്തനംതിട്ടയിലുമുണ്ടായ വാഹനാപകടങ്ങളിലാണ് രണ്ട് പേര്‍ മരിച്ചത്. 

ബൈക്ക് അപകടത്തില്‍ പരിക്കേറ്റ് ചികിത്സയിലായിരുന്ന മലപ്പുറത്തെ യുവതിയാണ് മരിച്ചത്. വാളക്കുളം സ്വദേശിയാണ് മരിച്ച മുബഷിറ(35). ഭര്‍ത്താവ് മന്‍സൂറിനൊപ്പം ബൈക്കില്‍ പോകുമ്പോഴായിരുന്നു സ്വകാര്യ ബസ് ഇടിച്ച്് അപകടമുണ്ടായത്.

ബുധനാഴ്ച്ച രാത്രി മലപ്പുറം എടരിക്കോട് വച്ചായിരുന്നു സംഭവം. യുവതിയെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. പോസ്റ്റ്‌മോര്‍ട്ടത്തിന് ശേഷം മൃതദേഹം കുടുംബത്തിന് വിട്ടു നല്‍കും.

പത്തനംതിട്ട റാന്നി ചെല്ലക്കാട്ട് കെഎസ്ആര്‍ടിസി ബസും കാറും കൂട്ടിയിടിച്ചുണ്ടായ അപകടത്തിലാണ് ഒരാള്‍ മരിച്ചത്. കാര്‍ യാത്രികനായ റാന്നി വയലത്തല സ്വദേശിയായ ഫിലിപ്പാണ് മരിച്ചത്.

പുനലൂര്‍ മൂവാറ്റുപുഴ സംസ്ഥാനപാതയിലാണ് അപകടം നടന്നത്. അപകടത്തില്‍ കാര്‍ പൂര്‍ണമായും തകര്‍ന്നിരുന്നു. കാര്‍ വെട്ടിപ്പൊളിച്ച് എടുത്താണ് ഫിലിപ്പിനെ പുറത്തെടുത്തത്. സംഭവസ്ഥലത്തുവച്ചു തന്നെ ഫിലിപ്പ് മരിച്ചിരുന്നു. മൃതദേഹം ആശുപത്രിയിലേക്ക് മാറ്റിയിട്ടുണ്ട്. പോസ്റ്റ്‌മോര്‍ട്ടത്തിന് ശേഷം കുടുംബത്തിന് വിട്ടു നല്‍കുന്നതാണ്.