കൊച്ചി: നടൻ ഷൈൻ ടോം ചാക്കോയ്‌ക്കെതിരെ നടി വിൻസി അലോഷ്യസ് ഫിലിം ചേംബറിന് നൽകിയ പരാതിയിലെ വിശദാംശങ്ങൾ പുറത്ത്. 'സൂത്രവാക്യം' എന്ന സിനിമയുടെ ചിത്രീകരണ സെറ്റിൽ ഷൈൻ ലൈംഗിക ചുവയോടെ സംസാരിച്ചുവെന്നും ലഹരി ഉപയോഗത്തെ തുടർന്ന് അദ്ദേഹത്തിന്റെ കണ്ണ് തടിച്ചതിനാൽ ഷൂട്ടിങ് മുടങ്ങിയെന്നും വിൻസി പരാതിയിൽ ആരോപിക്കുന്നു.

സെറ്റിൽ വസ്ത്രം മാറാൻ പോകുമ്പോൾ ഷൈൻ "ഞാൻ ശരിയാക്കിത്തരാം" എന്ന് പറഞ്ഞതായി വിൻസി വെളിപ്പെടുത്തി. തനിക്ക് മാത്രമല്ല, മറ്റ് അണിയറ പ്രവർത്തകർക്കും ഷൈനിൽ നിന്ന് സമാനമായ മോശം അനുഭവങ്ങൾ ഉണ്ടായിട്ടുണ്ടെന്നും അവർ കൂട്ടിച്ചേർത്തു. സിനിമയുടെ പുരോഗതി മുടങ്ങാതിരിക്കാൻ അന്ന് പ്രശ്നം ഉന്നയിക്കാതെ ചിത്രീകരണം പൂർത്തിയാക്കാൻ സഹകരിച്ചതായും വിൻസി വ്യക്തമാക്കി.

ബുധനാഴ്ച രാത്രി വിൻസി ഫിലിം ചേംബറിന് പരാതി നൽകി. സിനിമാ സെറ്റിൽ ലഹരി ഉപയോഗിച്ച് മോശമായി പെരുമാറിയതായി നടി സാമൂഹ്യമാധ്യമങ്ങളിലൂടെ ആദ്യം വെളിപ്പെടുത്തിയിരുന്നു. തുടർന്ന് ഷൈനിന്റെ പേര് വെളിപ്പെടുത്തി ഫിലിം ചേംബറിനും 'അമ്മ' സംഘടനയ്ക്കും പരാതി നൽകുകയായിരുന്നു. എന്നാൽ, ഷൈനിന്റെ പേര് പുറത്തുവിട്ടതിനെതിരെ ഫിലിം ചേംബർ ജനറൽ സെക്രട്ടറി സജി നന്ത്യാട്ടിനെതിരെയും വിൻസി രംഗത്തെത്തി.

പരാതി പരിശോധിക്കാൻ 'അമ്മ' സംഘടന മൂന്നംഗ സമിതിയെ നിയോഗിച്ചു. അൻസിബ, സരയൂ, വിനു മോഹൻ എന്നിവരാണ് സമിതി അംഗങ്ങൾ.