തൃശൂര്‍: കാളത്തോട് നാച്ചു എന്ന ഷമീറിനെ വെട്ടിക്കൊന്ന കേസില്‍ മുൻ പോപുലര്‍ ഫ്രണ്ട് പ്രവര്‍ത്തകരായിരുന്ന ആറ് പ്രതികളും കുറ്റക്കാരെന്ന് തൃശൂര്‍ ഒന്നാംക്ലാസ് അഡി.സെഷന്‍സ് കോടതി കണ്ടെത്തി. ശിക്ഷ 12 ന് വിധിക്കും. സി.ഐ.ടി.യു തൊഴിലാളിയായിരുന്ന ഷമീറിനെ 2022 ഒക്ടോബര്‍ 21 ന് പ്രതികൾ  വെട്ടിക്കൊല്ലുകയായിരുന്നുവെന്നാണ് കേസ്. സാക്ഷികളെ പ്രതികൾ പലവട്ടം ഭീഷണിപ്പെടുത്തിയതോടെ ഹൈക്കോടതി പ്രത്യേക ഇടപെടല്‍ നടത്തിയാണ് കേസ് വിചാരണ പൂര്‍ത്തിയാക്കിയത്. വിറ്റ്‌നസ് പ്രൊട്ടക്ഷന്‍ കാറ്റഗറിയില്‍പ്പെടുത്തി സാക്ഷികൾക്ക് പൊലിസ് സുരക്ഷയും ഹൈക്കോടതി അനുവദിച്ചിരുന്നു.

കാളത്തോട് നിവാസികളായ ഷാജഹാന്‍,  ഷബീര്‍, അമല്‍ സാലിഹ്, ഷിഹാസ്, നവാസ്, ഷംസുദ്ദീന്‍ എന്നീ മുൻ പി.എഫ്.ഐ പ്രവര്‍ത്തകരാണ് പ്രതികള്‍. ഇവര്‍ക്ക് കേസിന്റെ ആവശ്യത്തിനല്ലാതെ ജില്ലയിലേക്ക് കടക്കുവാന്‍ ഹൈക്കോടതി അനുമതി നല്‍കിയിരുന്നില്ല. 68 ഓളം സാക്ഷികളെ കേസിൽ വിസ്തരിച്ചു.  അജ്ഞാത ഫോൺ കോളുകളിലൂടെ  പല ഭീഷണികളും സാക്ഷികള്‍ക്ക് നേരിടേണ്ടി വന്ന സാഹചര്യത്തിലാണ്   പ്രത്യേക സുരക്ഷ  ഏര്‍പ്പെടുത്തിയത്. സി.സി.ടി.വി ദൃശ്യങ്ങള്‍, വിരലടയാളം, ഡി.എന്‍.എ പരിശോധനാ ഫലങ്ങള്‍ പ്രോസിക്യൂഷന്‍ കേസില്‍ ഹാജരാക്കിയിരുന്നു. ഗുഡ്സ് ഓട്ടോയുമായി വരികയായിരുന്ന ഷമീറിനെ പ്രതികൾ വാഹനം തടഞ്ഞ് വാളുകൊണ്ട് വെട്ടിയും ഇരുമ്പുപെപ്പ് കൊണ്ട് അടിച്ചും കൊലപ്പെടുത്തിയെന്നാണ് കേസ്.