തിരുവനന്തപുരം:കെ.പി.സി.സി നേതൃമാറ്റവുമായി ബന്ധപ്പെട്ട് പുതുതായി ഉയർന്നു കേൾക്കുന്ന പേരുകളോട് വിമുഖത പ്രകടിപ്പിച്ച് സംസ്ഥാനത്തെ മുതിർന്ന നേതാക്കൾ.

കഴിഞ്ഞ ദിവസം രാഹുൽ ഗാന്ധി സംസ്ഥാനത്തെ പ്രധാന നേതാക്കളുമായി ഫോണിൽ ബന്ധപ്പെട്ടപ്പോഴാണ് പലരും ആൻ്റോ ആൻ്റണി ഉൾപ്പെടെയുള്ള  പേരുകളോട് താൽപര്യമില്ലായ്മ പ്രകടിപ്പിച്ചത്. ഇത്തരത്തിൽ പകരം കേൾക്കുന്ന പേരുകൾ പാർട്ടിക്ക് ഗുണം ചെയ്യില്ലെന്ന  അഭിപ്രായം ഭൂരിഭാഗം നേതാക്കളും പങ്കുവച്ചതായാണ് വിവരം.

സുധാകരനെ മാറ്റേണ്ടതില്ലെന്ന് മുൻ അധ്യക്ഷന്മാരായ വി .എം സുധീരനും മുല്ലപ്പള്ളി രാമചന്ദ്രനും നിലപാടെടുത്തു. സുധാകരനെതിരേ നേരത്തേ പരസ്യ നിലപാടെടുത്ത മുല്ലപ്പള്ളിയും സുധീരനും ഇപ്പോൾ പിന്തുണച്ചത് പകരം കേൾക്കുന്ന പേരുകളോടുള്ള വിയോജിപ്പ് കാരണമാണെന്നാണ് വിലയിരുത്തൽ.

സാമുദായിക പരിഗണന മാത്രം നൽകി കെ.പി.സി.സി അധ്യക്ഷനെ തെരഞ്ഞെടുക്കരുതെന്ന നിർദേശവും നേതാക്കൾ മുന്നോട്ടുവച്ചു. എം.എം ഹസൻ, ബെന്നി ബഹനാൻ, ഹൈബി ഈഡൻ, ഷാഫി പറമ്പിൽ ഉൾപ്പെടെയുള്ള നേതാക്കളുമായും രാഹുൽ ഗാന്ധി ആശയവിനിമയം നടത്തി. ആൻ്റോ ആൻ്റണിയെ കെ.പി.സി.സി അധ്യക്ഷനാക്കുന്നതിനുള്ള ധാരണ രൂപപ്പെട്ടിരുന്നെങ്കിലും, പരക്കെ പരാതികൾ ലഭിച്ചതോടെയാണ് വീണ്ടും അഭിപ്രായം തേടുന്നതിനുള്ള നീക്കം ഹൈക്കമാൻഡിൻ്റെ ഭാഗത്ത് നിന്നുണ്ടായത്.