തിരുവനന്തപുരം: കോൺഗ്രസ് വിട്ട് സി.പി.എമ്മിലെത്തിയ ഡോ. പി.സരിന് നിർണായക പദവി നൽകി സർക്കാർ. വിജ്ഞാന കേരളം ഉപദേശകനായിട്ടാണ് നിയമിച്ചത്. 80,000 രൂപയാണ് മാസ ശമ്പളം. ഉത്തരവ് കൈപ്പറ്റിയെന്നും ഈ ആഴ്ച തന്നെ ചുമതലയേറ്റെടുക്കുമെന്നും സരിൻ പറഞ്ഞു.  

കെ.പി.സി.സി ഡിജിറ്റൽ മീഡിയ സെൽ കൺവീനറായിരുന്ന സരിൻ പാലക്കാട് ഉപതെരഞ്ഞെടുപ്പിന്റെ സമയത്തായിരുന്നു കോൺഗ്രസ് വിട്ട് സി.പി.എമ്മിൽ അഭയം തേടിയത്. ഉപതെരഞ്ഞെടുപ്പിൽ രാഹുൽ മാങ്കൂട്ടത്തിലിനെതിരേ എൽ.ഡി.എഫ് സ്വതന്ത്രനായി മത്സരിച്ചെങ്കിലും മൂന്നാം സ്ഥാനത്തെത്താൻ മാത്രമേ സാധിച്ചിരുന്നുള്ളൂ. എന്നിരുന്നാലും നിർണായകമായ ഒരു തിരഞ്ഞെടുപ്പിൽ ഒപ്പം നിന്ന സരിനെ ചേർത്തുപിടിക്കാനാണ് പാർട്ടി തീരുമാനം.

നിലമ്പൂർ ഉപതിരഞ്ഞെടുപ്പ് ആസന്നമായിരിക്കെയാണ് സി.പി.എമ്മിന്റെ ഈ നീക്കം. പ്രതിസന്ധിഘട്ടത്തിൽ സഹായവുമായെത്തിയവരെ കൈവിടില്ലെന്ന സന്ദേശം കൂടി നൽകുകയാണ് ഈ നീക്കത്തിന് പിന്നിലെന്നാണ് സൂചന.  സരിന് സർക്കാരിന്റെ അഭിമാന പദ്ധതികളെ മുന്നോട്ടു നയിക്കാൻ കഴിയുമെന്നാണ് പ്രതീക്ഷ. വിദ്യാഭ്യാസം നേടിയ യുവതീയുവാക്കളുടെ തൊഴിലില്ലായ്മക്ക് പരിഹാരം കണ്ടെത്താൻ സർക്കാർ ആരംഭിച്ച പദ്ധതിയാണ് വിജ്ഞാന കേരളം.