കുവൈത്ത് സിറ്റി: കുവൈത്തിലെ പുതിയ ഗതാഗത നിയമം ഇന്ന് മുതല്‍ പ്രാബല്യത്തില്‍. രാജ്യത്ത് റോഡപകടങ്ങള്‍ കുറക്കുന്നതിനായാണ് ഈ നിയമങ്ങള്‍ രൂപകല്‍പന ചെയ്തിരിക്കുന്നത്. മാത്രമല്ല നിയമലംഘകര്‍ക്ക് കര്‍ശനമായ പിഴകളും, അറസ്റ്റും ഉള്‍പ്പെടുന്ന ശിക്ഷാനടപടികളും നിയമത്തില്‍ വ്യവസ്ഥ ചെയ്തിട്ടുണ്ട്. 1976 ലെ നിയമത്തിന് പകരമായി നിലവില്‍ വന്ന ഈ നിയമം, ഗുരുതരമായ കുറ്റകൃത്യങ്ങളില്‍ കുറ്റവാളികളെ അറസ്റ്റ് ചെയ്യാന്‍ ട്രാഫിക് പൊലിസിന് അധികാരം നല്‍കുകയും പിഴകള്‍ വര്‍ദ്ധിപ്പിക്കുകയും ചെയ്തിട്ടുണ്ട്.

മദ്യപിച്ചോ മയക്കുമരുന്ന് ഉപയോഗിച്ചോ വാഹനമോടിക്കുക, പരുക്കോ, മരണമോ സംഭവിക്കുന്ന അപകടമുണ്ടാക്കുക, പെര്‍മിറ്റില്ലാതെ കാര്‍ റേസില്‍ ഏര്‍പ്പെടുക, അപകടത്തെത്തുടര്‍ന്ന് രക്ഷപ്പെടാന്‍ ശ്രമിക്കുകയോ, വാഹനം നിര്‍ത്താനുള്ള പൊലിസിന്റെ ഉത്തരവ് അനുസരിക്കാതിരിക്കുകയോ ചെയ്യുക തുടങ്ങിയ സാഹചര്യങ്ങളില്‍ കുറ്റവാളികളെ അറസ്റ്റ് ചെയ്യാന്‍ ട്രാഫിക് പൊലിസിനെ ചുമതലപ്പെടുത്തും.

1) വാഹനമോടിക്കുമ്പോള്‍ മൊബൈല്‍ ഫോണ്‍ ഉപയോഗിച്ചാല്‍ 75 കുവൈത്ത് ദിനാര്‍ പിഴ ലഭിക്കും; കൂടാതെ മൂന്ന് മാസം വരെ തടവും 150 മുതല്‍ 300 കുവൈത്ത് ദിനാര്‍ വരെ പിഴയും ലഭിക്കും.

2) വികലാംഗര്‍ക്കായി നിശ്ചയിച്ചിട്ടുള്ള സ്ഥലങ്ങളില്‍ പാര്‍ക്ക് ചെയ്താല്‍ 150 കുവൈത്ത് ദിനാര്‍ പിഴ; മൂന്ന് വര്‍ഷം വരെ തടവും 600 മുതല്‍ 1,000 കുവൈത്ത് ദിനാര്‍ വരെ പിഴയും.

3) സാധുവായ ലൈസന്‍സ് ഇല്ലാതെ വാഹനമോടിച്ചാല്‍ അല്ലെങ്കില്‍ സസ്‌പെന്‍ഡ് ചെയ്തതോ തെറ്റായതോ ആയ ലൈസന്‍സ് ഉപയോഗിച്ചാല്‍: 75 കുവൈത്ത് ദിനാര്‍ പിഴ; 3 മാസം വരെ തടവും 150 മുതല്‍ 300 ദിനാര്‍ വരെ പിഴയും.

4) വാഹനമോടിക്കുമ്പോള്‍ മൊബൈല്‍ ഫോണ്‍ ഉപയോഗിക്കുന്നതിനുള്ള പിഴ 5 ദിനാറില്‍ നിന്ന് 75 ദിനാര്‍ ആയി വര്‍ദ്ധിപ്പിച്ചു.

5) സീറ്റ് ബെല്‍റ്റ് ധരിക്കാത്തതിനുള്ള പിഴ 30 ദിനാര്‍ ആയി ഉയര്‍ത്തി.

6) അശ്രദ്ധമായി വാഹനമോടിച്ചാല്‍ 150 ദിനാര്‍ പിഴ ചുമത്തും.

7) വികലാംഗര്‍ക്ക് അനുവദിച്ച പാര്‍ക്കിംഗ് സ്ഥലങ്ങള്‍ നിയമവിരുദ്ധമായി ഉപയോഗിച്ചാല്‍ മുമ്പ് 10 ദിനാറായിരുന്നു പിഴ, എന്നാല്‍ പുതിയ നിയമത്തില്‍ ഇത് 150 മുതല്‍ 1000 ദിനാര്‍ വരെ ആയി ഉയര്‍ത്തിയിട്ടുണ്ട്. കൂടാതെ മൂന്ന് വര്‍ഷം വരെ തടവിനും സാധ്യതയുണ്ട്.

8) ചുവപ്പ് സിഗ്‌നല്‍ മറികടന്ന് വാഹനമോടിക്കുന്നതിന് മൂന്ന് വര്‍ഷം വരെ തടവും പരമാവധി 1,000 ദിനാര്‍ പിഴയും ലഭിക്കും. പുതിയ നിയമപ്രകാരം പ്രവാസികള്‍ക്ക് ഒരു കാര്‍ മാത്രം കൈവശം വക്കാനേ അനുവാദമുള്ളൂ. അതേസമയം, പ്രവാസികള്‍ ഗുരുതരമായ ഗതാഗത നിയമലംഘനങ്ങള്‍ ആവര്‍ത്തിച്ചാല്‍ നാടുകടത്തുമെന്ന് അധികൃതര്‍ അറിയിച്ചിരുന്നു.

Kuwait implements stringent new traffic regulations starting today, introducing harsh penalties including hefty fines and potential jail time for violations. The updated laws aim to enhance road safety and discipline among motorists. Authorities warn drivers to strictly adhere to speed limits, seatbelt rules, and other traffic norms to avoid severe consequences under the revamped legal framework.