തൃശൂര്‍: ഗുരുവായൂര്‍ ക്ഷേത്രത്തില്‍ റീല്‍സ് ചിത്രീകരിച്ചതിന് ബിജെപി സംസ്ഥാന അധ്യക്ഷനും മുന്‍ കേന്ദ്രമന്ത്രിയുമായ രാജീവ് ചന്ദ്രശേഖറിനെതിരെ പരാതി. കെപിസിസി മീഡിയ പാനലിസ്റ്റും അഭിഭാഷകനുമായ വിആര്‍ അനൂപാണ് ഗുരുവായൂര്‍ ടെമ്പിള്‍ പൊലീസില്‍ പരാതി നല്‍കിയത്. ഹൈക്കോടതി ഉത്തരവ് ലംഘിച്ച് രാജീവ് ചന്ദ്രശേഖര്‍ ക്ഷേത്ര പരിസരത്ത് വീഡിയോ ചിത്രീകരിച്ച് സാമൂഹിക മാധ്യമങ്ങളില്‍ പ്രചരിപ്പിച്ചുവെന്നാണ് ആരോപണം.

നടപ്പന്തലിലും ദീപസ്തംഭത്തിന് മുന്നിലും നിന്ന് ചിത്രീകരിച്ച വീഡിയോ രാജീവ് ചന്ദ്രശേഖര്‍ സാമൂഹിക മാധ്യമങ്ങളില്‍ പോസ്റ്റ് ചെയ്തിരുന്നു. ക്ഷേത്രത്തില്‍ വിവാഹങ്ങള്‍ക്കും ആചാരപരമായ കര്‍മങ്ങള്‍ക്കും മാത്രമാണ് നടപ്പന്തലില്‍ വീഡിയോ ചിത്രീകരണത്തിന് അനുമതിയുള്ളത്. എന്നാല്‍, ഈ നിയന്ത്രണം ലംഘിച്ചാണ് വീഡിയോ ചിത്രീകരണം നടത്തിയതെന്ന് പരാതിയില്‍ ചൂണ്ടിക്കാട്ടുന്നു. ഗുരുവായൂര്‍ ക്ഷേത്ര പരിസരത്ത് മാധ്യമങ്ങള്‍ക്കും റീല്‍സ് ചിത്രീകരണത്തിനും ഹൈക്കോടതി വിലക്ക് ഏര്‍പ്പെടുത്തിയിട്ടുണ്ട്.

വീഡിയോ ശ്രദ്ധയില്‍പ്പെട്ടിട്ടില്ലെന്നും അന്വേഷണം നടത്തുമെന്നും ഗുരുവായൂര്‍ ദേവസ്വം അധികൃതര്‍ പ്രതികരിച്ചു. നേരത്തെ, സമാനമായ ആരോപണത്തില്‍ ചിത്രകാരി ജസ്ന സലീമിനെതിരെ ക്ഷേത്രനടപ്പുരയില്‍ വീഡിയോ ചിത്രീകരിച്ചതിന് പൊലീസ് കലാപാഹ്വാനത്തിന് കേസെടുത്തിരുന്നു.