വയനാട്: കൽപ്പറ്റയിൽ വേനൽമഴക്കിടെ ഇടിമിന്നലേറ്റ് 73 വയസ്സുകാരിക്ക് പരിക്ക്. കാവുമന്ദം സ്വദേശി ഏലിയാമ്മ മാത്യുവിനാണ് ഇടിമിന്നലേറ്റത്. ഇവരെ കൽപ്പറ്റയിലെ സ്വകാര്യ ആശുപത്രിയിൽ പ്രവേശിപ്പിച്ചു. വ്യാഴാഴ്ച ഉച്ചയ്ക്ക് മൂന്ന് മണിയോടെ കൽപ്പറ്റ ഉൾപ്പെടെയുള്ള വയനാട്ടിലെ വിവിധ മേഖലകളിൽ മഴ പെയ്തിരുന്നു. മറ്റ് മഴക്കെടുതികൾ ഇതുവരെ റിപ്പോർട്ട് ചെയ്തിട്ടില്ല.

ഇടിമിന്നൽ അതീവ അപകടകാരിയാണെന്ന് അധികൃതർ മുന്നറിയിപ്പ് നൽകി. മനുഷ്യർക്കും മൃഗങ്ങൾക്കും ജീവഹാനി വരുത്തുന്നതിന് പുറമെ, വൈദ്യുത-ആശയവിനിമയ ശൃംഖലകൾക്കും വൈദ്യുതോപകരണങ്ങൾക്കും ഇടിമിന്നൽ കാര്യമായ നാശനഷ്ടമുണ്ടാക്കും. അതിനാൽ, കാർമേഘം കണ്ടുതുടങ്ങുന്ന സമയം മുതൽ പൊതുജനങ്ങൾ മുൻകരുതലുകൾ സ്വീകരിക്കണം.

മുൻകരുതലുകൾ:

• ഇടിമിന്നലിന്റെ ആദ്യ ലക്ഷണം കണ്ടാൽ ഉടൻ സുരക്ഷിതമായ കെട്ടിടത്തിനുള്ളിലേക്ക് മാറുക. തുറസ്സായ സ്ഥലങ്ങളിൽ നിൽക്കുന്നത് അപകടസാധ്യത വർധിപ്പിക്കും.

• ശക്തമായ കാറ്റും ഇടിമിന്നലും പ്രതീക്ഷിക്കുന്ന സമയത്ത് ജനലുകളും വാതിലുകളും അടച്ചിടുക. ജനലിനോ വാതിലിനോ സമീപം നിൽക്കാതിരിക്കുക.

• വൈദ്യുതോപകരണങ്ങളുടെ ബന്ധം വിച്ഛേദിക്കുക. ഇടിമിന്നൽ സമയത്ത് വൈദ്യുത ഉപകരണങ്ങളുമായുള്ള സമ്പർക്കം ഒഴിവാക്കുക.

• ലാൻഡ്‌ലൈൻ ടെലിഫോൺ ഉപയോഗിക്കുന്നത് ഒഴിവാക്കുക. മൊബൈൽ ഫോൺ ഉപയോഗിക്കുന്നതിൽ തടസ്സമില്ല.

• മേഘാവൃതമായ അന്തരീക്ഷത്തിൽ കുട്ടികൾ ഉൾപ്പെടെ തുറസ്സായ സ്ഥലങ്ങളിലോ ടെറസിലോ കളിക്കുന്നത് ഒഴിവാക്കുക.

• ഇടിമിന്നൽ സമയത്ത് മരച്ചുവട്ടിൽ നിൽക്കുകയോ വാഹനങ്ങൾ പാർക്ക് ചെയ്യുകയോ ചെയ്യരുത്.

• വാഹനത്തിനുള്ളിൽ തുടരുന്നവർ കൈകാലുകൾ പുറത്തേക്കിടാതിരിക്കുക. സൈക്കിൾ, ബൈക്ക്, ട്രാക്ടർ എന്നിവയിലുള്ള യാത്ര ഒഴിവാക്കി സുരക്ഷിതമായ കെട്ടിടത്തിൽ അഭയം തേടുക.

• മഴക്കാറ് കണ്ടാൽ തുണികൾ എടുക്കാനോ മറ്റ് ആവശ്യങ്ങൾക്കോ ടെറസിലേക്കോ മുറ്റത്തേക്കോ പോകരുത്.