കൊച്ചി: മുഖ്യമന്ത്രിയുടെ ചീഫ് പ്രിന്‍സിപ്പല്‍ സെക്രട്ടറി കെ.എം എബ്രഹാമിനെതിരെ അനധികൃത സ്വത്ത് സമ്പാദന പരാതിയില്‍ കേസെടുത്ത് സിബിഐ. അഴിമതി നിരോധന നിയമത്തിലെ വകുപ്പ് പ്രകാരമാണ് കേസ് എടുത്തത്. ഹൈകോടതി ഉത്തരവു പ്രകാരമാണ് നടപടി. കേസിന്റെ എഫ്.ഐ.ആര്‍ ഇന്ന് സിബിഐ കോടതിയില്‍ സമര്‍പിക്കും. മുഖ്യമന്ത്രിയുടെ ചീഫ് പ്രിന്‍സിപ്പല്‍ സെക്രട്ടറിയും കിഫ്ബി സിഇഒയും മുന്‍ ചീഫ് സെക്രട്ടറിയുമാണ് കെഎം എബ്രഹാം.  

മുംബൈയിലെ 3 കോടി വിലയുള്ള അപ്പാര്‍ട്ട്‌മെന്റ്, തിരുവനന്തപുരത്തെ ഒരുകോടിയുടെ അപ്പാര്‍ട്ട്‌മെന്റ്, കൊല്ലം കടപ്പാക്കടയിലെ 8 കോടി വിലയുള്ള ഷോപ്പിങ് കോംപ്ലക്‌സ് അടക്കമുള്ള ആസ്തികള്‍ ഇയാളുടെ വരവില്‍ കവിഞ്ഞ സ്വത്താണെന്നാണ് ആരോപണം. ആദ്യം പരാതി അന്വേഷിച്ചത് സംസ്ഥാന വിജിലന്‍സായിരുന്നു. അന്ന് ജേക്കബ്‌തോമസ് വിജിലന്‍സ് ഡയറക്ടറായിരിക്കെ ഉദ്യോഗസ്ഥര്‍ എബ്രഹാമിന്റെ വീട്ടില്‍ പരിശോധന നടത്തിയത് വലിയ വിവാദമായിരുന്നു.

പെന്‍ ഡൗണ്‍ സമരം നടത്തിയാണ് ഐഎഎസ് ഉദ്യോഗസ്ഥര്‍ പ്രതിഷേധം അറിയിച്ചിരുന്നത്. ജേക്കബ് തോമസ് ഡയറക്ടര്‍ സ്ഥാനത്തു നിന്ന് മാറിയതോടെ എബ്രഹാമിന് കേസില്‍ ക്ലിന്‍ ചീറ്റും കിട്ടി. തുടരന്വേഷണം നടത്തണമെന്ന ആവശ്യം 2017 ല്‍ തിരവുനന്തപുരം  വിജിലന്‍സ് കോടതി തള്ളുകയും ചെയ്തു. 

 ജോമോന്‍ പുത്തന്‍ പുരയ്ക്കല്‍ കേസ് സിബിഐ അന്വേഷിക്കണം എന്നാവശ്യപ്പെട്ട് 2018 ല്‍ ഹൈക്കോടതിയെ സമീപിച്ചിരുന്നു. 2025 ഏപ്രില്‍ 11ന് കേസ് സിബിഐ അന്വേഷിക്കാന്‍ ഹൈക്കോടതി ഉത്തരവിടുകയും ചെയ്തു. എബ്രഹാമിനെ രക്ഷിക്കാന്‍ ആസൂത്രിത ശ്രമം നടന്നതായി കോടതിയും വിലയിരുത്തി. വരവില്‍ കവിഞ്ഞ സ്വത്തിന് പ്രഥമ ദൃഷ്ട്യാ തെളിവ് ഉണ്ടെന്നും കോടതി പറഞ്ഞു.