തൃശൂർ: ബിജെപി നേതാവ് ശോഭ സുരേന്ദ്രന്റെ വീടിന് മുന്നില്‍ പൊട്ടിയത് പടക്കമാണെന്നും, സംഭവത്തില്‍ ദുരൂഹതയില്ലെന്നും പൊലിസ്. നാട്ടുകാരായ മൂന്ന് യുവാക്കള്‍ ചേര്‍ന്നാണ് പടക്കം പൊട്ടിച്ചത്. ഈസ്റ്ററിന് വാങ്ങിയ പടക്കമാണ് പൊട്ടിച്ചതെന്ന് യുവാക്കള്‍ മൊഴി നല്‍കി. 

സ്വന്തം വീടിന് മുന്നിലാണ് ഇവര്‍ പടക്കം പൊട്ടിച്ചത്. പൊട്ടിത്തെറിക്ക് പിന്നാലെ പൊലിസ് എത്തിയതോടെ ഇവര്‍ പേടിച്ച് മാറി നില്‍ക്കുകയായിരുന്നു. ബിജെപി സംഭവത്തില്‍ ദുരൂഹത ആരംഭിച്ചതോടെ കാര്യം കൂടുതല്‍ ഗൗരവകരമായി. പിന്നാലെയാണ് പടക്കമാണ് പൊട്ടിച്ചതെന്ന് യുവാക്കള്‍ മൊഴി നല്‍കിയത്. അലക്ഷ്യമായി പടക്കം പൊട്ടിച്ചതിന് മാത്രം കേസെടുത്ത് ഇവരെ വെറുതെവിടും.

ശോഭ സുരേന്ദ്രന്റെ അയ്യന്തോളിയിലെ വീടിന് മുന്നില്‍ പൊട്ടിത്തെറി നടന്നെന്ന് പരാതി ലഭിച്ചിരുന്നു. രാത്രിയില്‍ തന്റെ വാഹനം പുറത്ത് പോയതിന് പിന്നാലെ വീടിന് മുന്നിലെ റോഡില്‍ പൊട്ടിത്തെറി ശബ്ദം കേട്ടെന്നാണ് ശോഭ സുരേന്ദ്രന്‍ പറഞ്ഞത്. ഇത് തനിക്ക് നേരെ നടന്ന ആക്രമണമാണെന്നും, സംഭവത്തിന് പിന്നിലുള്ളവരെ പുറത്ത് കൊണ്ടുവരണമെന്നും ശോഭ പറഞ്ഞിരുന്നു. ബൈക്കിലെത്തിയ നാലുപേര്‍ സ്‌ഫോടക വസ്തു എറിഞ്ഞെന്നാണ് ആരോപണം. 

പിന്നാലെ തൃശൂര്‍ ജില്ലയിലെ ബിജെപി നേതാക്കളുടെ വീടുകള്‍ക്ക് സംരക്ഷണം നല്‍കാന്‍ പൊലിസ് നിര്‍ദേശം നല്‍കിയിരുന്നു.

police have confirmed there is no mystery surrounding the incident infront of bjp leader shobha surendran house