ദുബൈ: ഇന്ത്യന്‍ രൂപയുടെ മൂല്യം വീണ്ടും ഉയര്‍ന്നു. യുഎഇ, സഊദി അറേബ്യ, മറ്റ് ഗള്‍ഫ് രാജ്യങ്ങള്‍ എന്നിവിടങ്ങളിലെ ഇന്ത്യന്‍ പ്രവാസികള്‍ക്കിത് ഗുണകരമാകുമെന്നാണ് പ്രതീക്ഷിക്കുന്നത്. ഇതിനാല്‍ തന്നെ രൂപയുടെ മൂല്യം ഇനിയും വര്‍ധിക്കുമെന്ന പ്രതീക്ഷയില്‍ നാട്ടിലേക്ക് പണം അയക്കുന്നത് വൈകിപ്പിക്കുകയാണ് പ്രവാസികള്‍ ഏറെപ്പേരും.

ദിര്‍ഹമിന് 22.82 എന്ന നിലയിലാണ് ഇപ്പോള്‍ രൂപയുടെ മൂല്യം. 2024 ഒക്ടോബര്‍ 10ന് ശേഷമുള്ള ഏറ്റവും കുറഞ്ഞ വ്യത്യാസമാണിത്. കറന്‍സി എക്‌സ്‌ചേഞ്ച് ഹൗസുകളുടെ കണക്കനുസരിച്ച്, കഴിഞ്ഞ 48 മണിക്കൂറിനുള്ളില്‍ യുഎഇ, ഗള്‍ഫ് വിപണികളില്‍ നിന്നുള്ള പണമടയ്ക്കല്‍ അളവില്‍ വ്യക്തമായ ഇടിവ് ഉണ്ടായിട്ടുണ്ട്. രൂപയുടെ സ്ഥിരത താല്‍ക്കാലികമാണോ എന്ന് പ്രവാസി ഇന്ത്യക്കാര്‍ ഉറ്റുനോക്കുകയാണ്. ഇക്കാരണത്താല്‍ തന്നെ ഈ സാഹചര്യത്തില്‍ ഇന്ത്യന്‍ പ്രവാസികള്‍ വീട്ടിലേക്ക് പണം അയക്കാന്‍ മടി കാണിക്കുന്നു.

ദിര്‍ഹത്തിനെതിരെയുള്ള ഇന്ത്യന്‍ രൂപയുടെ നിലവാരം 23ഓ അല്ലെങ്കില്‍ 23ല്‍ താഴെയോ ആയി തുടരുന്നത് നല്ലതാണെന്ന് എഫ്എക്‌സ് വ്യവസായ വൃത്തങ്ങള്‍ പറയുന്നു. 

''ഇന്ത്യന്‍ രൂപ ഇന്ന് രാവിലെ ദിര്‍ഹമിനെതിരെ 22.82ലേക്ക് ഉയര്‍ന്ന് ഡോളറിനെതിരെ 83.86ല്‍ എത്തുമെന്നാണ് പ്രതീക്ഷിക്കുന്നത്,'' സീനിയര്‍ കറന്‍സി അനലിസ്റ്റ് നീലേഷ് ഗോപാലന്‍ പറഞ്ഞു. 

''അടുത്ത ആഴ്ചയുടെ ആരംഭം മുതല്‍ പകുതി വരെ ഇന്ത്യന്‍ രൂപയുടെ മൂല്യം കൂടുമെന്നോ കുറയുമെന്നോ  എന്നറിയാന്‍ സമയമെടുക്കും.'' അദ്ദേഹം കൂട്ടിച്ചേര്‍ത്തു.

അതേസമയം, ഇന്ത്യന്‍ ഓഹരി വിപണികളിലേക്കുള്ള ഡോളറിന്റെ ഒഴുക്ക് തുടരുകയാണ്. ഇന്ത്യന്‍ രൂപയ്ക്ക്  ആശ്വാസം നല്‍കുന്ന കാര്യമാണിത്. പഹല്‍ഗാം ആക്രമണത്തിന് ശേഷം അടുത്തത് എന്താണെന്നതിനെക്കുറിച്ചുള്ള പിരിമുറുക്കങ്ങള്‍ പുകയുമ്പോഴാണിത്.

As the Indian rupee gains value, many expatriates in the UAE and Saudi Arabia are choosing to delay remittances, hoping for better exchange rates to maximize returns.