കോഴിക്കോട് : രാജ്യത്ത് വർദ്ധിച്ചുവരുന്ന ആൾക്കൂട്ട അക്രമങ്ങളും കൊലപാതകങ്ങളും ആര് എന്തിൻറെ പേരിൽ ചെയ്താലും അംഗീകരിക്കാൻ കഴിയില്ലെന്നും നിയമ സംവിധാനങ്ങളെ വെല്ലുവിളിക്കുന്ന രീതിയിൽ കുറ്റവാളികൾ തെരുവിൽ നിയമം കയ്യിലെടുക്കുന്ന അവസ്ഥക്ക് അറുതി വരുത്തണമെന്നും എസ്കെഎസ്എസ്എഫ് സംസ്ഥാന പ്രസിഡൻ്റ് പാണക്കാട് സയ്യിദ് ഹമീദലി ശിഹാബ് തങ്ങളും ജനറൽ സെക്രട്ടറി ഒ.പി അഷ്റഫ് കുറ്റിക്കടവും ആവശ്യപ്പെട്ടു.

ബാംഗ്ലൂരിൽ കഴിഞ്ഞ ദിവസം അഷ്റഫ് എന്ന മലയാളി യുവാവ്  ആൾക്കൂട്ട ആക്രമത്തിൽ ക്രൂരമായി കൊലചെയ്യപ്പെട്ടത് ഉത്തരവാദിത്തപ്പെട്ട സർക്കാറുകൾ ഗൗരവത്തിൽ കാണണം. പരമത വിദ്വേഷവും അപരവൽക്കരണവും വർദ്ധിച്ചുവരുന്ന പുതിയ കാലത്ത് ഇഷ്ടമില്ലാത്ത ആരെയും സംഘം ചേർന്ന് കൊല്ലാനും അതിനെ ന്യായീകരിക്കാനും അവസരമുണ്ടാകുന്നത് പരിഷ്കൃത സമൂഹത്തിന് യോജിച്ചതല്ല. തെരുവിൽ അഴിഞ്ഞാടുന്ന ക്രിമിനലുകൾ  ദേശസ്നേഹത്തിന്റെ പേരിലുള്ള വ്യാജവാർത്തകളും കള്ളപ്രചരണങ്ങളും നടത്തി രക്ഷപ്പെടുകയാണ്. ചില മുൻവിധികൾ വച്ചുപുലർത്തുന്ന ഭരണകൂടവും നിയമപാലകരും കുറ്റവാളികൾക്ക് സഹായകമാകുന്ന തരത്തിൽ പെരുമാറുന്നത് ആൾക്കൂട്ട ആക്രമങ്ങൾ വർധിക്കാനും ജനങ്ങൾക്ക് നിയമ വ്യവസ്ഥയിലുള്ള വിശ്വാസം നഷ്ടപ്പെടാനും കാരണമാകും. അഷ്റഫിന്റെ കൊലപാതകത്തിന് കാരണക്കാരായവരെ നിയമത്തിന് മുമ്പിൽ കൊണ്ടുവന്ന് മാതൃകാപരമായി ശിക്ഷിക്കണമെന്നും നേതാക്കൾ ആവശ്യപ്പെട്ടു.