തിരുവനന്തപുരം: വിഴിഞ്ഞം തുറമുഖം ഉദ്ഘാടന വേദിയിൽ ബി.ജെ.പി സംസ്ഥാന അധ്യക്ഷൻ രാജീവ് ചന്ദ്രശേഖർ പിൻവാതിലിലൂടെയാണ് ഇരിപ്പിടം തരപ്പെടുത്തിയതെന്നും ഇത് അൽപത്തരമെന്നും സി.പി.എം മുഖപത്രമായ ദേശാഭിമാനി. 
ഉദ്ഘാടനത്തിനു മണിക്കൂറുകൾക്കു മുമ്പ് വേദിയിൽ ഇടംപിടിച്ച അദ്ദേഹം സദസിൽ കൊണ്ടിരുത്തിയ ബി.ജെ.പിക്കാർക്കു മുദ്രാവാക്യം വിളിച്ചുകൊടുത്ത് അൽപത്തരം പ്രദർശിപ്പിക്കുന്ന രംഗങ്ങൾക്കും രാജ്യം സാക്ഷിയായി. 

രാജ്യത്തിന്റെയാകെ വികസനത്തിനു നാഴികക്കല്ലാകുന്ന ഈ സന്ദർഭത്തിൽ സങ്കുചിതവും ബാലിശവുമായ മുതലെടുപ്പ് രാഷ്ട്രീയം പ്രയോഗിച്ച് പ്രതിപക്ഷ നേതാവും നാണംകെട്ടു. വേദിയിൽ ഇരിക്കാൻ അവസരമുണ്ടായിട്ടും ക്രെഡിറ്റ് തന്നില്ലെന്ന് ചൊടിച്ച് ചടങ്ങ് ബഹിഷ്‌കരിച്ച വി.ഡി സതീശൻ ഒറ്റപ്പെട്ടു. ശശി തരൂർ എം.പിയും എം. വിൻസെന്റ് എം.എൽ.എയും കോൺഗ്രസ് കൗൺസിലർമാരും മറ്റ് ജനപ്രതിനിധികളും ചടങ്ങിൽ ആവേശപൂർവം പങ്കെടുത്തിരുന്നുവെന്നും മുഖപ്രസംഗത്തിൽ പറയുന്നു. 

തുറമുഖത്തിന് വായ്പയായി വി.ജി.എഫ് മാത്രം അനുവദിച്ച ബി.ജെ.പിക്ക് പദ്ധതിയുടെ പിതൃത്വാവകാശം ഉന്നയിക്കാൻ യാതൊരു അർഹതയുമില്ലെന്നും മുഖപ്രസംഗം വിമർശിക്കുന്നു. കേരള ജനതയുടെ കഴിവുകൾ രാജ്യത്തെ തുറമുഖ മേഖലയെ മുന്നോട്ടുനയിക്കുമെന്നാണ് പ്രധാനമന്ത്രി പറഞ്ഞത്. കേരളത്തിന് അവകാശപ്പെട്ട സാമ്പത്തിക സഹായങ്ങൾപോലും തടഞ്ഞുവച്ച് നമ്മുടെ സമ്പദ്ഘടനയെ ശ്വാസംമുട്ടിക്കുന്ന ബി.ജെ.പി സർക്കാരിനെ നയിക്കുന്ന വ്യക്തിയിൽനിന്നുള്ളതാണ് ഈ വാക്കുകളെന്നും മുഖപ്രസംഗത്തിൽ പറയുന്നു.