തൃപ്പൂണിത്തുറ: താലൂക്ക് ആശുപതിയിൽ നിന്നും വിട്ടുനൽകിയ മൃതദേഹം മാറിപ്പോയത് മരണ വീട്ടിൽ നാടകീയ രംഗങ്ങൾ സൃഷ്ടിച്ചു. ഉദയംപേരൂർ പഞ്ചായത്ത് തെക്കൻപറവൂർ പേയ്ക്കൽ വീട്ടിൽ പി.കെ രവി (71) യുടെ മൃതദേഹമാണ് തൃപ്പൂണിത്തുറ താലൂക്കാശുപത്രിയിൽ നിന്നും ബന്ധുക്കൾ മാറിക്കൊണ്ടുപോയത്. അസുഖ ബാധിതനായിരുന്ന രവിക്ക് ശനിയാഴ്ച രാത്രിയോടെ രോഗം മൂർച്ഛിക്കുകയായിരുന്നു. നില വഷളായതോടെ ബന്ധുക്കൾ ഇദ്ദേഹത്തെ തൃപ്പൂണിത്തുറ താലൂക്കാശുപത്രിയിലേക്ക് കൊണ്ടുപോയെങ്കിലും  വഴിമധ്യേ മരിച്ചു.

തുടർന്ന് ആശുപത്രി മോർച്ചറിയിലേക്ക് മാറ്റിയ മൃതദേഹം ഇന്നലെ രാവിലെ വീട്ടിലേയ്ക്ക് കൊണ്ടുവന്നപ്പോഴാണ് അബദ്ധം സംഭവിച്ചത്. തുടർച്ചയായ ചികിത്സയിലായിരുന്നതിനാൽ പോസ്റ്റ്മോർട്ടം ഒഴിവാക്കി നൽകിയ മൃതദേഹം വീട്ടിലെത്തിച്ചപ്പോൾ തന്നെ മാറിയെന്ന് സംശയമുയർന്നിരുന്നു. ബന്ധുക്കളും അയൽവാസികളുമെത്തി ആദരാഞ്ജലിയർപ്പിച്ച്  അന്ത്യകർമങ്ങൾക്കായി കുളിപ്പിക്കാനെടുത്തപ്പോഴാണ് മൃതദേഹം  രവിയുടേതല്ല എന്ന് സംശയം കലശലായത്. ഉടൻ തന്നെ  ആശുപത്രിയുമായി ബന്ധപ്പെട്ട ബന്ധുക്കൾ തുടർന്ന് മൃതദേഹവുമായി മോർച്ചറിയിലെത്തി യഥാർഥ മൃതദേഹം ഏറ്റുവാങ്ങി വീട്ടിലെത്തിക്കുകയായിരുന്നു.  ഉച്ചയ്ക്ക് രണ്ടോടെ  തൃപ്പൂണിത്തുറ പൊതുശ്മശാനത്തിൽ മൃതദേഹം സംസ്കരിക്കുകയും ചെയ്തു.

അതേസമയം ഇതേ കുറിച്ച് വിവരമൊന്നും ലഭിച്ചില്ലെന്നാണ് താലൂക്കാശുപത്രി സൂപ്രണ്ട് ഡോ.സുമ പറഞ്ഞത്. നടപടിക്രമങ്ങൾ പൂർത്തിയാക്കിയ ശേഷമാണ് മൃതദേഹങ്ങൾ മോർച്ചറിയിൽ നിന്നും വിട്ടുനൽകാറുള്ളതെന്ന് അവർ പറഞ്ഞു.