കോഴിക്കോട്: പന്നിയങ്കരയില്‍ കല്യാണ വീട്ടില്‍ ക്ഷണിക്കാതെ എത്തി വരൻ്റെ സുഹൃത്തിനെ കുത്തിപ്പരിക്കേൽപ്പിച്ച സംഭവത്തിൽ പ്രതി പിടിയിൽ. ചക്കുകടവ് സ്വദേശി മുബീനാണ് പിടിയിലായത്. കോഴിക്കോട് കോതിപ്പാലത്ത് വെച്ചാണ് മുബീനെ പന്നിയങ്കര പൊലിസ് പിടികൂടിയത്. മൊബൈൽ ലൊക്കേഷൻ കേന്ദ്രീകരിച്ച് നടത്തിയ അന്വേഷണത്തിലാണ് പ്രതി പിടിയിലായത്. 

സംഭവത്തിന് ശേഷം മംഗലാപുരത്തേക്ക് കടന്ന പ്രതി തിരിച്ച് കോഴിക്കോടെത്തി ഭാര്യയെ ഫോണിൽ വിളിച്ചതാണ് വിനയായത്. ഇയാൾക്കെതിരെ വധശ്രമം അടക്കമുള്ള വകുപ്പുകൾ ചുമത്തി പൊലിസ് കേസെടുത്തിട്ടുണ്ട്.

ഞായറാഴ്ച രാത്രിയായിരുന്നു കേസിനാസ്പദമായ സംഭവം. പന്നിയങ്കര സ്വദേശി ഇന്‍സാഫിനാണ് പരുക്കേറ്റത്. ഇൻസാഫിന്റെ കവിളിനായിരുന്നു കുത്തേറ്റത്. ബാര്‍ബര്‍ ഷോപ്പില്‍ ഉപയോഗിക്കുന്ന കത്തി ഉപയോഗിച്ചായിരുന്നു പ്രതി ആക്രമണം നടത്തിയത്.

പന്നിയങ്കര സ്വദേശിയായ വിഷ്ണുവിന്റെ വിവാഹത്തിനെത്തിയതായിരുന്നു സുഹൃത്തായ ഇന്‍സാഫ്. ഇതേസമയം കല്യാണസ്ഥലത്തെത്തിയ മുബീന്‍ കല്യാണവീട്ടില്‍ ആളുകളുമായി പരിചയപ്പെട്ട് മദ്യപിച്ച് ബഹളം വെക്കാനാരംഭിക്കുകയായിരുന്നു. തുടര്‍ന്ന് ക്ഷണിക്കാതെ എത്തിയതാണ് എന്ന് മനസിലായതോടെ വിഷ്ണുവിന്റെ സുഹൃത്തുക്കള്‍ ഇയാളെ വീട്ടില്‍ നിന്ന് പുറത്താക്കി. 

എന്നാല്‍ അരമണിക്കൂറിന് ശേഷം മുബീന്‍ തിരിച്ചെത്തി. തുടര്‍ന്നു നടന്ന തര്‍ക്കത്തിനൊടുവില്‍ ഇന്‍സാഫിന്റെ മുഖത്ത് കത്തി കൊണ്ട് വരഞ്ഞ പ്രതി സംഭവ സ്ഥലത്ത് നിന്ന് ഓടി രക്ഷപ്പെടുകയായിരുന്നു.

Police arrested Mubeen, a Chakkukadav native, for allegedly stabbing his friend who arrived uninvited at a wedding house in Panniyankara, Kozhikode. The accused was apprehended in Kothippalam through mobile location tracking. Details on the shocking wedding gatecrash incident.