ഇസ്രായേലിന്റെ സുരക്ഷാ കാബിനറ്റ് ഗാസ മുഴുവൻ പിടിച്ചെടുക്കാനും അനിശ്ചിത കാലത്തേക്ക് നിലനിൽക്കാനുമുള്ള പദ്ധതികൽ അംഗീകരിച്ചതായി റിപ്പോർട്ടുകൾ. ഹമാസ് കൈവശം വച്ചിരിക്കുന്ന ബന്ധികളെ മോചിപ്പിക്കാനും ഇസ്രായേലിന്റെ നിബന്ധനകളിൽ വെടിനിർത്തൽ ചർച്ചകൾ നടത്താനും പ്രേരിപ്പിക്കുകയാണ് പുതിയ നീക്കത്തിന്റെ ലക്ഷ്യം. പദ്ധതി ലക്ഷക്കണക്കിന് പലസ്തീനികളെ ദക്ഷിണ ഗാസയിലേക്ക് മാറ്റിപ്പാർപ്പിക്കുന്നതിനും ഇതിനകം തന്നെ തുടരുന്ന ഗുരുതരമായ മാനുഷിക പ്രതിസന്ധിയെ കൂടുതൽ വഷളാക്കുന്നതിനും കാരണമാകും.

അടുത്ത ആഴ്ച യു.എസ്. പ്രസിഡന്റ് ഡൊണാൾഡ് ട്രംപ് മേഖലയിൽ സന്ദർശനം നടത്താനിരിക്കുകയാണ്. ഇതിന് പിന്നാലെ തീവ്രമായ സൈനിക നടപടികൾ ആരംഭിക്കാൻ പദ്ധതിയിട്ടിരിക്കുന്നതായി ടൈംസ് ഓഫ് ഇസ്രായേൽ റിപ്പോർട്ട് ചെയ്യുന്നു. ചില പ്രദേശങ്ങളിൽ മാത്രം കേന്ദ്രീകരിച്ച് ആരംഭിക്കുന്ന സൈനിക നടപടികൾ പതുക്കെ വ്യാപിപ്പിക്കാനാണ് തീരുമാനം.

ഇറാനെതിരെയും 
കഴിഞ്ഞ ദിവസം ഇസ്രയേലിലെ ബെൻ ഗുരിയോൺ വിമാനത്താവളത്തിന് നേരെ യെമനിലെ ഹൂതി വിമതർ നടത്തിയ മിസൈൽ ആക്രമണത്തിന് ശക്തമായ തിരിച്ചടി നൽകുമെന്ന് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു പ്രഖ്യാപിച്ചു. ഇറാനും ഇതിന്റെ പ്രത്യാഘാതങ്ങൾ നേരിടേണ്ടിവരുമെന്ന് അദ്ദേഹം വ്യക്തമാക്കി. ഇസ്രയേലിനെ ആക്രമിക്കുന്നവർക്ക് ഏഴിരട്ടി പ്രതികരണം നേരിടേണ്ടിവരുമെന്ന് ഇസ്രയേൽ മന്ത്രി ഇസ്രയേൽ കാറ്റ്സും അവകാശപ്പെട്ടു. ഞായറാഴ്ച, ഇസ്രയേലിന്റെ വ്യോമപ്രതിരോധ സംവിധാനങ്ങളെ വെട്ടിച്ച് ഹൂതികളുടെ മിസൈൽ വിമാനത്താവളത്തിന് സമീപം പതിച്ചിരുന്നു. ഈ സംഭവത്തിൽ എട്ട് പേർക്ക് പരിക്കേറ്റു. തുടർന്ന്, എയർ ഇന്ത്യ ഉൾപ്പെടെയുള്ള വിമാനക്കമ്പനികൾ ഇസ്രയേലിലേക്കുള്ള സർവീസുകൾ താൽക്കാലികമായി നിർത്തിവെച്ചു.

ഗാസയിലെ മാനുഷിക പ്രതിസന്ധി ഇതിനകം തന്നെ അതീവ ഗുരുതരമാണ്. യുദ്ധവും അടച്ചുപൂട്ടലും കാരണം ഭക്ഷണം, വെള്ളം, വൈദ്യസഹായം തുടങ്ങിയ അടിസ്ഥാന ആവശ്യങ്ങൾക്ക് പോലും പലസ്തീനികൾ ബുദ്ധിമുട്ടുന്നു. പുതിയ പദ്ധതി ഈ പ്രതിസന്ധിയെ കൂടുതൽ വഷളാക്കുമെന്ന് സഹായ സംഘടനകൾ മുന്നറിയിപ്പ് നൽകുന്നു. ഗാസയിലെ ആരോഗ്യ മന്ത്രാലയത്തിന്റെ കണക്കനുസരിച്ച്, 2023 ഒക്ടോബർ മുതൽ 52,000-ത്തിലധികം പലസ്തീനികൾ കൊല്ലപ്പെട്ടിട്ടുണ്ട്, അതിൽ ഭൂരിഭാഗവും സ്ത്രീകളും കുട്ടികളുമാണ്.

പുതിയ നീക്കം ദക്ഷിണ ഗാസയിലേക്ക് എതിർപ്പില്ലാതെ കുടിയേറേണ്ട അവസ്ഥയിൽ ലക്ഷക്കണക്കിന് കുടുംബങ്ങളെ എത്തിക്കും. ഇതിനകം തന്നെ ജീവിതാവശ്യങ്ങളിലെ തീരെ പരിമിതികളിൽ ഒതുങ്ങി കഴിയുന്ന ജനതയ്ക്ക് ഇനി മുന്നിൽ പ്രതീക്ഷകൾക്കപ്പുറമുള്ള ഒരു മനുഷ്യരഹിത ഭൂമി മാത്രമാണുള്ളത്. ഗാസയിലെ പ്രതിസന്ധി നേരത്തെ തന്നെ അത്യന്തം ദാരുണമായിരുന്നു. ഭക്ഷണം കിട്ടാൻ മണിക്കൂറുകളോളം കാത്തിരിക്കേണ്ട അവസ്ഥ, കുടിവെള്ളത്തിന് വേണ്ടി കാത്തിരിക്കേണ്ട അവസ്ഥ, മരണം മുന്നിലുണ്ടാകുമ്പോഴും വൈദ്യ സഹായം എത്തിച്ചേരാത്ത ദയനീയത. എല്ലാം കൂടി ഒരു ജനതയുടെ ആത്മാവിനെ തന്നെ ഇല്ലാതാക്കുകയാണ്. പുതിയ ഇസ്രായേൽ പദ്ധതി ഇതിനകം തന്നെ നിസ്സഹായമായ ഫലസ്തീൻ ജനങ്ങളെ കൂടുതൽ ഇല്ലാതാക്കുമെന്നാണ് സഹായസംഘടനകളുടെ ശക്തമായ മുന്നറിയിപ്പ്. 

ഇസ്രായേൽ പതിനായിരക്കണക്കിന് റിസർവിസ്റ്റുകളെ വിളിച്ചുവരുത്തി, ഗാസയിലെ സൈനിക നടപടികൾ വിപുലീകരിക്കാനുള്ള പദ്ധതികൾ ആസൂത്രണം ചെയ്യുന്നു. ഇത് ഹമാസിനെതിരായ സമ്മർദ്ദം വർധിപ്പിക്കാനുള്ള ശ്രമത്തിന്റെ ഭാഗമാണ്. ഗാസയിലെ സാധാരണക്കാർ ഭയാനകമായ സാഹചര്യങ്ങളിലാണ് ജീവിക്കുന്നത്. ഭക്ഷണക്ഷാമം, വൈദ്യസഹായത്തിന്റെ അഭാവം, നിരന്തരമായ ബോംബാക്രമണങ്ങൾ  അവരുടെ ജീവിതത്തെ ദുസ്സഹമാക്കുന്നു. ഐക്യരാഷ്ട്രസഭയുടെ റിപ്പോർട്ടുകൾ പ്രകാരം, ഗാസയിലെ ആരോഗ്യ സംവിധാനം തകർച്ചയുടെ വക്കിലാണ്, കുട്ടികൾ ഉൾപ്പെടെയുള്ളവർ പട്ടിണിയുടെ വക്കിലാണ്.