ഡല്‍ഹി: ഭീകരവാദത്തിനെതിരെയുള്ള ഇന്ത്യയുടെ പോരാട്ടത്തിനും പഹല്‍ഗാം ആക്രമണത്തിലെ കുറ്റവാളികളെ നിയമത്തിനു മുമ്പിലെത്തിക്കുന്നതിനുള്ള എല്ലാ നടപടികള്‍ക്കും പൂര്‍ണ്ണ പിന്തുണ പ്രഖ്യാപിച്ച് ഖത്തര്‍. ഖത്തര്‍ അമീര്‍ ഷെയ്ഖ് തമീം ബിന്‍ ഹമദ് അല്‍ഥാനി ഇന്ത്യന്‍ പ്രധാനമന്ത്രി നരേന്ദ്ര മോദിയുമായി നടത്തിയ ഫോണ്‍ സംഭാഷണത്തിലാണ് തങ്ങളുടെ നിലപാട് വ്യക്തമാക്കിയത്. 

ഭീകരതയ്‌ക്കെതിരെയുള്ള ഇന്ത്യന്‍ പോരാട്ടത്തിനും കുറ്റവാളികളെ നിയമത്തിന് മുന്നിലെത്തിക്കുന്നതിനുള്ള എല്ലാ നടപടികള്‍ക്കും ഖത്തര്‍ അമീര്‍ പൂര്‍ണ്ണ പിന്തുണ അറിയിച്ചിട്ടുണ്ടെന്ന് വിദേശകാര്യ വക്താവ് രണ്‍ധീര്‍ ജയ്‌സ്വാള്‍ വ്യക്തമാക്കി. ഈ പിന്തുണയ്ക്കും ഐക്യദാര്‍ഢ്യത്തിനും പ്രധാനമന്ത്രി നരേന്ദ്ര മോദി അമീറിനോട് നന്ദി പറഞ്ഞതായും ജയ്‌സ്വാള്‍ വിശദീകരിച്ചു.

ഇന്ത്യ-ഖത്തര്‍ ബന്ധം ശക്തിപ്പെടുത്തുന്നതിനും ഈ വര്‍ഷം തുടക്കത്തില്‍ അമീര്‍ ഇന്ത്യ സന്ദര്‍ശിച്ച സമയത്ത് എടുത്ത തീരുമാനങ്ങള്‍ നടപ്പാക്കുന്നതിനുമുള്ള പ്രതിബദ്ധത ഇരു നേതാക്കളും ആവര്‍ത്തിച്ചു. ഇരു രാജ്യങ്ങളും തമ്മിലുള്ള ഉഭയകക്ഷി ബന്ധങ്ങളെക്കുറിച്ചും പരസ്പരം പിന്തുണയ്ക്കുന്നതിനും ബന്ധം ശക്തിപ്പെടുത്തുന്നതിനെക്കുറിച്ചും ഇരുവരും സംസാരിച്ചു. ഇരു രാജ്യങ്ങൾക്കും പരസ്പരതാൽപ്പര്യമുള്ള മേഖലകളെക്കുറിച്ചും, അന്തർദേശീയ സംഭവവികാസങ്ങളെക്കുറിച്ചും ചർച്ച ചെയ്തു.

Qatar's Amir Sheikh Tamim bin Hamad Al Thani assured full support to India's counter-terrorism efforts and bringing Pulwama attack perpetrators to justice during a phone call with PM Modi. Strengthening bilateral ties.