ശ്വാസംമുട്ടുക, ചുമയ്ക്കുക, ശ്വാസത്തിന് തടസ്സം വരുക എന്നിവയാല്‍ കാണപ്പെടുന്ന ഒരു വിട്ടുമാറാത്ത ശ്വസനരോഗമാണ് ആസ്ത്മ. വസന്തകാലത്തിലും വേനല്‍കാലത്തിലും പൊടിയിലൂടെയും വായുവിലൂടെയും പകരുന്ന മറ്റു അലര്‍ജികള്‍ എന്നിവയുടെ സമ്പര്‍ക്കം വര്‍ധിക്കുന്നതിനാല്‍ ലക്ഷണങ്ങള്‍ വഷളാവുകയും ചെയ്യുന്നു.

ആസ്ത്മയുള്ളവര്‍ക്ക് ചികിത്സാരീതിയും ശരിയായ മുന്‍കരുതലുകളും ഉപയോഗിച്ചു തന്നെ അതിന്റെ ലക്ഷണങ്ങളെ ഫലപ്രദമായി കൈകാര്യം ചെയ്യാനും ആരോഗ്യകരവും സുഖകരവുമായ ജീവിതം നയിക്കാനും കഴിയും. 

എന്താണ് ആസ്ത്മയ്ക്ക് കാരണമാവുന്ന ഘടകങ്ങള്‍ എന്ന് ആദ്യം കണ്ടെത്തുക. ഇത് തിരിച്ചറിയേണ്ടത് പ്രധാനമാണ്. ചിലര്‍ക്ക് പൊടിയോ മറ്റുചിലര്‍ക്ക് മൃഗങ്ങളുടെയോ അല്ലെങ്കില്‍ മറ്റെന്തെങ്കിലുമൊക്കെ ആവാം അലര്‍ജിക്കു കാരണമാവുന്നത്  അത് കണ്ടെത്തുക.

നല്ല ആരോഗ്യകരമായ ഭക്ഷണരീതി പാലിക്കുക. വിറ്റാമിന്‍സി, ആന്റിഓക്‌സിഡന്റുകള്‍ എന്നിവ അടങ്ങിയവയായിരിക്കണം. ഇത് പ്രതിരോധശേഷി വര്‍ധിപ്പിക്കാനും എല്ലാതരം അണുബാധകളില്‍ നിന്നു സംരക്ഷിക്കാനും സഹായിക്കുന്നു. ഇത്തരക്കാര്‍ വൈറല്‍ അണുബാധകളെ വളരെയധികം ശ്രദ്ധിക്കേണ്ടതാണ്. 

വ്യായാമം പതിവായി ചെയ്യുക. അതിനായി പുറത്തുപോയി ചെയ്യണമെന്നില്ല. അതുകൊണ്ട് വീടിനകത്തും ഇത് ചെയ്യാവുന്നതാണ്. ഇത് ശ്വാസകോശ ശേഷി വികസിപ്പിക്കാനും പേശികളുടെ ശക്തി വര്‍ധിപ്പിക്കാനും സഹായിക്കും. 

സമ്മര്‍ദ്ദവും ആസ്ത്മയ്ക്കു കാരണമാവാം. അതിനാല്‍ തന്നെ ആസ്ത്മ രോഗികള്‍ വൈകാരികമായ ആരോഗ്യവും ശ്രദ്ധിക്കുക. 

പുകവലി ഉപേക്ഷിക്കുക തന്നെ വേണം. കാരണം ഇതില്‍ 4000ത്തോളം രാസവസ്തുക്കള്‍ അടങ്ങിയിട്ടുണ്ട്. അവയില്‍ 50ല്‍ അധികം എണ്ണം അര്‍ബുദകാരികളുമാണ്. അവ കാന്‍സറിന് കാരണമാവും. അതുകൊണ്ട് തന്നെ പുകവലി പൂര്‍ണമായും ഉപേക്ഷിക്കുക തന്നെ വേണം. 

ഇന്‍ഹേലറുകള്‍ ആസ്ത്മയ്ക്കു സ്ഥിരമായി ഉപയോഗിക്കുന്ന മരുന്നുകളാണ്. അവ മുടങ്ങാതെ ഉപയോഗിക്കുക. ആസ്ത്മ അപ്രത്യക്ഷമാവാനും വീണ്ടും ഉണ്ടാവാനും സാധ്യതയുണ്ടെന്ന് ഓര്‍മിക്കേണ്ടതുമാണ്.