തിരുവനന്തപുരം: സംസ്ഥാനത്ത് വൈദ്യുതി മോഷണവും മറ്റ് ക്രമക്കേടുകളും ആശങ്കാജനകമായി വർധിക്കുന്നു. കെ.എസ്.ഇ.ബിയുടെ ആന്റി-പവർ തെഫ്റ്റ് സ്ക്വാഡ് (എ.പി.ടി.എസ്), ചീഫ് വിജിലൻസ് ഓഫിസർ പ്രശാന്തൻ കാണി ഐ.പി.എസിന്റെ നേതൃത്വത്തിൽ, 2023-24 സാമ്പത്തിക വർഷം 31,213 പരിശോധനകൾ നടത്തി. ഇതിൽ 4,252 ക്രമക്കേടുകളാണ് കണ്ടെത്തിയത്, 288 വൈദ്യുതി മോഷണ കേസുകളും രജിസ്റ്റർ ചെയ്തു. കോമ്പൗണ്ടിങ് ഫീസ് ഉൾപ്പെടെ 2.6 കോടി രൂപ പിഴ ഈടാക്കി. 2024-25 സാമ്പത്തിക വർഷത്തിൽ 4.7 കോടി യൂനിറ്റ് വൈദ്യുതി ക്രമക്കേടുകൾ മൂലം നഷ്ടപ്പെട്ടു, ഇത് 48 കോടി രൂപയുടെ സാമ്പത്തിക നഷ്ടമുണ്ടാക്കി.

എ.പി.ടി.എസ് രേഖകൾ പ്രകാരം, കുറ്റവാളികളിൽ നിന്ന് 24 കോടി രൂപ ഇതുവരെ പിഴ ഈടാക്കി. വൈദ്യുതി മോഷണം പ്രധാനമായും ഗാർഹിക, കാർഷിക, വാണിജ്യ കണക്ഷനുകളിലാണ്. ചില കേസുകളിൽ, ഇലക്ട്രീഷ്യൻമാർ ഉപഭോക്താക്കളുടെ അറിവോ സമ്മതമോ ഇല്ലാതെ ക്രമക്കേടുകൾ നടത്തിയതായി കണ്ടെത്തി. മോഷണം മൂലം 12.5 ലക്ഷം യൂനിറ്റ് വൈദ്യുതി (12.27 കോടി രൂപ) നഷ്ടപ്പെട്ടു. മറ്റ് ക്രമക്കേടുകൾ 33.8 കോടി രൂപയുടെ നഷ്ടമുണ്ടാക്കി. 

വൈദ്യുതി മോഷണം ഏറ്റവും കൂടുതൽ വടക്കൻ ജില്ലകളിലാണ്. കാസർകോടും മലപ്പുറവുമാണ് മോഷണ കേസുകളിൽ മുന്നിൽ. കഴിഞ്ഞ മാർച്ചിൽ മാത്രം 1.43 ലക്ഷം യൂനിറ്റ് വൈദ്യുതി മോഷണം പോയി, ഇതിൽ 1.33 ലക്ഷം യൂനിറ്റ് വടക്കൻ ജില്ലകളിൽ. അനധികൃത ലോഡ്, എക്സ്റ്റൻഷൻ, താരിഫ് ദുരുപയോഗം തുടങ്ങിയ ക്രമക്കേടുകളും വ്യാപകമായി. ഇതുമൂലം 3.7 കോടി യൂനിറ്റ് വൈദ്യുതി നഷ്ടപ്പെട്ടു, ഏകദേശം 34 കോടി രൂപയുടെ സാമ്പത്തിക നഷ്ടം കെ.എസ്.ഇ.ബിക്കുണ്ടായി. തെക്കൻ ജില്ലകളിൽ മറ്റ് ക്രമക്കേടുകൾ കൂടുതലാണ്. ആദ്യമായി കുറ്റം ചെയ്യുന്നവർക്ക് പിഴയും കോമ്പൗണ്ടിങ് ഫീസും അടച്ച് കേസിൽ നിന്ന് ഒഴിവാകാം. എന്നാൽ, കുറ്റം ആവർത്തിച്ചാൽ ജാമ്യമില്ലാ വകുപ്പുകൾ ചുമത്തും. വൈദ്യുതി നിയമപ്രകാരം മൂന്ന് വർഷം തടവും പിഴയും ശിക്ഷയായി ലഭിക്കാം.