ജമ്മു കശ്മീർ: രജൗരി നഗരത്തിൽ പാകിസ്ഥാൻ നടത്തിയ ഷെൽ ആക്രമണത്തിൽ ജമ്മു കശ്മീരിലെ മുതിർന്ന സർക്കാർ ഉദ്യോഗസ്ഥനായ അഡീഷണൽ ജില്ലാ വികസന കമ്മീഷണർ രാജ് കുമാർ താപ്പ കൊല്ലപ്പെട്ടു. മുഖ്യമന്ത്രി ഒമർ അബ്ദുള്ളയുടെ അവലോകന യോഗത്തിൽ പങ്കെടുത്ത ഉദ്യോഗസ്ഥനാണ് കൊല്ലപ്പെട്ടത്. ആക്രമണത്തിൽ രണ്ട് നാട്ടുകാരും മരിച്ചതായി ജമ്മു കശ്മീർ സർക്കാർ സ്ഥിരീകരിച്ചു.

അതിനിടെ, പാകിസ്ഥാന്റെ തുടർച്ചയായ പ്രകോപനങ്ങൾക്ക് മറുപടിയായി ഇന്ത്യ എട്ട് പാക് നഗരങ്ങളിൽ പ്രത്യാക്രമണം നടത്തി. ഇസ്ലാമാബാദ്, റാവൽപിണ്ടി, ലാഹോർ, പെഷവാർ, സിയാൽകോട്ട്, ഗുജ്റൺവാല, അട്ടോക്ക് എന്നിവിടങ്ങളിൽ ഇന്ത്യ ഡ്രോൺ ആക്രമണം നടത്തിയതായി റിപ്പോർട്ടുകൾ. പാകിസ്ഥാന്റെ ഒരു പോർവിമാനം തകർത്തതായും വിവരമുണ്ട്. ഇസ്ലാമാബാദിന് സമീപമുള്ള നൂർ ഖാൻ വ്യോമതാവളം ഉൾപ്പെടെ മൂന്ന് വ്യോമസേനാ താവളങ്ങളിൽ ശനിയാഴ്ച പുലർച്ചെ ശക്തമായ സ്ഫോടനങ്ങൾ നടന്നതായി പാകിസ്ഥാൻ സ്ഥിരീകരിച്ചു. എന്നാൽ, ഇന്ത്യ ഈ ആക്രമണങ്ങൾ ഔദ്യോഗികമായി സ്ഥിരീകരിച്ചിട്ടില്ല.

അതിർത്തിയിൽ സംഘർഷം രൂക്ഷം

പാകിസ്ഥാന്റെ ആക്രമണങ്ങൾ ബാരാമുള്ള മുതൽ ഭുജ് വരെയുള്ള 26 സ്ഥലങ്ങളിൽ കേന്ദ്രീകരിച്ചിരുന്നു. ഫിറോസ്‌പൂരിലെ ജനവാസ മേഖലയിൽ നടന്ന ഡ്രോൺ ആക്രമണത്തിൽ ഒരു കുടുംബത്തിലെ മൂന്ന് പേർക്ക് പരിക്കേറ്റു. തുടർച്ചയായ രണ്ടാം ദിവസവും പാകിസ്ഥാൻ നിയന്ത്രണ രേഖയിൽ ഷെല്ലിങ് തുടരുകയാണ്.

അതിർത്തിയിലെ സംഘർഷം രൂക്ഷമായതിനെ തുടർന്ന് പ്രധാനമന്ത്രി നരേന്ദ്ര മോദി ഉന്നതതല യോഗം വിളിച്ചു. പ്രതിരോധമന്ത്രി രാജ്നാഥ് സിംഗ്, വിദേശകാര്യ മന്ത്രി എസ്. ജയശങ്കർ എന്നിവരുമായി മോദി കൂടിക്കാഴ്ച നടത്തി. സേനാ മേധാവികളുമായി രാജ്നാഥ് സിംഗ് പ്രത്യേക യോഗം ചേരും. പ്രതിരോധ, വിദേശകാര്യ മന്ത്രിമാർ രാവിലെ മാധ്യമങ്ങളെ കാണുമെന്ന് അറിയിച്ചിരുന്നെങ്കിലും യോഗം മാറ്റിവെച്ചു. സ്ഥിതിഗതികൾ നിയന്ത്രണാതീതമാകുന്ന സാഹചര്യത്തിൽ ഇന്ത്യ ശക്തമായ നിലപാട് സ്വീകരിക്കുമെന്ന് സർക്കാർ വൃത്തങ്ങൾ അറിയിച്ചു.