ന്യൂഡല്‍ഹി: കേണല്‍ സോഫിയ ഖുറേഷിക്കെതിരെ അധിക്ഷേപ പരാമര്‍ശവുമായി മധ്യപ്രദേശിലെ ബിജെപി നേതാവ്. സോഫിയ ഖുറേഷി ഭീകരവാദികളുടെ സഹോദരിയാണെന്നാണ് ബിജെപി മന്ത്രി കൂടിയായ വിജയ് ഷാ പറഞ്ഞത്. മന്ത്രിയുടെ വിവാദ പ്രസ്താവനക്കെതിരെ ശക്തമായ പ്രതിഷേധവുമായി കോണ്‍ഗ്രസ് രംഗത്തെത്തി. 

ഇന്‍ഡോറില്‍ നടന്ന പരിപാടിയിലാണ് വിജയ് ഷായുടെ പരോക്ഷ അധിക്ഷേപം. 'ഭീകരവാദികള്‍ നമ്മുടെ സഹോദരിമാരുടെയും, പെണ്‍മക്കളുടെയും സിന്ദൂരം തുടച്ചുമാറ്റി അനാദരവ് കാണിച്ചു. അവര്‍ക്ക് മറുപടി നല്‍കാന്‍ ഞങ്ങള്‍ അവരുടെ സ്വന്തം സഹോദരിയെ അയച്ചുവെന്നായിരുന്നു മന്ത്രി പറഞ്ഞത്. സംഭവത്തിന്റെ ദൃശ്യങ്ങള്‍ സമൂഹ മാധ്യമങ്ങളില്‍ വൈറലായതോടെ ശക്തമായ പ്രതിഷേധമാണ് ബിജെപിക്കെതിരെ ഉയരുന്നത്. 

വിജയ് ഷായുടെ പരാമര്‍ശം ഇന്ത്യന്‍ സേനയെ അപമാനിക്കുന്നതിന് തുല്യമാണെന്ന് കോണ്‍ഗ്രസ് കുറ്റപ്പെടുത്തി. ഇന്ത്യയുടെ മകളായ കേണല്‍ സോഫിയ ഖുറേഷി നമ്മുടെ അഭിമാനമാണ്, എന്നിട്ടും അവരെക്കുറിച്ച് ഇത്തരമൊരു ഹീനമായ പരാമര്‍ശം മധ്യപ്രദേശിലെ ബിജെപി സര്‍ക്കാരിലെ മന്ത്രിയായ വിജയ് ഷാ നടത്തിയതെന്നും ബിഹാര്‍ കോണ്‍ഗ്രസ് എക്‌സില്‍ കുറിച്ചു. 

ഓപ്പറേഷന്‍ സിന്ദൂറിന് പിന്നാലെ ഇന്ത്യയുടെ സൈനിക നടപടിയെക്കുറിച്ച് രാജ്യത്തോട് വിശദീകരിച്ച രണ്ട് വനിത സൈനികരില്‍ ഒരാളാണ് കേണല്‍ സോഫിയ ഖുറേഷി. ഇന്ത്യന്‍ സേനയിലെ പെണ്‍കരുത്തിന്റെ മുഖമായാണ് കരസേന കമാന്‍ഡറെ രാജ്യം കാണുന്നത്. ബിജെപി നേതാവിന്റെ വിവാദ വീഡിയോ സമൂഹമാധ്യമങ്ങളില്‍ പ്രചരിച്ചതോടെ വലിയ വിമര്‍ശനങ്ങളാണ് ബിജെപിക്കെതിരെ ഉയരുന്നത്.

bjp leader vijay sha hate speech against colonel sofiya qureshi