ന്യൂഡല്‍ഹി: പാക് അധിനിവേശ കശ്മീര്‍ ഇന്ത്യക്ക് തിരികെ നല്‍കണമെന്ന നിര്‍ണായക പ്രഖ്യാപനവുമായി ഇന്ത്യ. വിദേശ കാര്യ മന്ത്രാലയ വക്താവ് രണ്‍ദീപ് ജയ്‌സ്‌വാള്‍ ഇക്കാര്യം പ്രഖ്യാപിച്ചത്. കശ്മീര്‍ വിഷയത്തില്‍ മൂന്നാം കക്ഷിയുടെ ഇടപെടല്‍ ആവശ്യമില്ലെന്നും അദ്ദേഹം വ്യക്തമാക്കി.

കശ്മീരുമായി ബന്ധപ്പെട്ട മുഴുവന്‍ കാര്യങ്ങള്‍ക്കുമുള്ള പരിഹാരം ഇന്ത്യയും പാകിസ്ഥാനും ചര്‍ച്ചകളിലൂടെ കണ്ടെത്തണമെന്ന നിലപാടാണ് ഇന്ത്യക്കുള്ളത്. ഈ നയത്തില്‍ മാറ്റമില്ല. പാകിസ്ഥാന്‍ അനധികൃതമായി കൈവശം വച്ചിരിക്കുന്ന ഇന്ത്യന്‍ പ്രദേശം തിരികെ നല്‍കുക എന്നതാണ് ഇപ്പോഴത്തെ പ്രധാന വിഷയമെന്നും ജയ്‌സ്‌വാള്‍ പറഞ്ഞു.

ഓപ്പറേഷന്‍ സിന്ദൂറിനു ശേഷം നിലവില്‍ വന്ന വെടിനിര്‍ത്തല്‍ കരാറില്‍ മൂന്നാമതൊരു രാജ്യത്തിന്റെ ഇടപെടല്‍ ഉണ്ടായിട്ടില്ലെന്നും അദ്ദേഹം പറഞ്ഞു. വെടിനിര്‍ത്തലിനായി സമീപിച്ചത് പാകിസ്ഥാനാണെന്നും ഡിജിഎംഒ തലത്തിലാണ് ചര്‍ച്ച നടന്നതെന്നും അദ്ദേഹം പറഞ്ഞു.

ഇന്ത്യന്‍ സൈന്യത്തിന്റെ ശക്തിയാണ് പാകിസ്ഥാനെ വെടിനിര്‍ത്തലിനു പ്രേരിപ്പിച്ചത്. വെടിനിര്‍ത്തല്‍ കരാറില്‍ മൂന്നാമതൊരു കക്ഷി മധ്യസ്ഥത വഹിച്ചിട്ടില്ലെന്നും രണ്‍ദീപ് ജയ്‌സ്‌വാള്‍ വിശദീകരിച്ചു.

ഇന്ത്യയുടെ നയം ലോക നേതാക്കളും പാക് ഭരണകൂടത്തെ അറിയിച്ചിട്ടുണ്ടാകും. എന്നാല്‍ ആരും മധ്യസ്ഥത വഹിച്ചിട്ടില്ലെന്നും അദ്ദേഹം പറഞ്ഞു.

'നിങ്ങള്‍ക്കറിയാവുന്നതുപോലെ, ആണവ ഭീഷണിക്ക് വഴങ്ങുകയോ അതിര്‍ത്തി കടന്നുള്ള ഭീകരവാദം നടത്താന്‍ അനുവദിക്കുകയോ ചെയ്യില്ലെന്ന് ഇന്ത്യ ഉറച്ച നിലപാട് സ്വീകരിക്കുന്നു. പല ലോകരാജ്യങ്ങളെയും ഞങ്ങള്‍ ഇക്കാര്യം അറിയിച്ചിട്ടുണ്ട്. അത്തരം സാഹചര്യങ്ങള്‍ക്ക് അവര്‍ വഴങ്ങുന്നത് അവരുടെ സ്വന്തം മേഖലയില്‍ അവര്‍ക്ക് ദോഷം ചെയ്യുമെന്ന് ഞങ്ങള്‍ മുന്നറിയിപ്പും നല്‍കിയിട്ടുണ്ട്.' ബഹാവല്‍പൂര്‍, മുരിദ്‌കെ, മുസാഫറാബാദ് തുടങ്ങിയ പ്രദേശങ്ങളിലെ പാകിസ്ഥാന്റെ തീവ്രവാദ കേന്ദ്രങ്ങള്‍ ഇന്ത്യ നശിപ്പിച്ചുവെന്നും അവരുടെ സൈനിക ശക്തി ദുര്‍ബലപ്പെടുത്തിയെന്നും രണ്‍ദീപ് പറഞ്ഞു.