തിരുവനന്തപുരം:  സീനിയർ അഭിഭാഷകൻ ബെയ്ലിൻ ദാസ് ക്രൂരമായി മർദിച്ച സംഭവത്തിൽ നിയമനടപടിയുമായി മുന്നോട്ടു പോകുമെന്ന് വഞ്ചിയൂർ കോടതിയിലെ ജൂനിയർ വനിതാ അഭിഭാഷക ശ്യാമിലി ജസ്റ്റിൻ. നീതി ലഭിക്കും വരെ പോരാട്ടം തുടരുമെന്നും അവർ മാധ്യമങ്ങളോട് പ്രതികരിച്ചു. ബെയ്‌ലിൻ ദാസിനെതിരെ അവർ  ബാർ കൗൺസിലിന് പരാതി നൽകിയിട്ടുണ്ട്. വഞ്ചിയൂർ പൊലിസിലും അവർ പരാതി നൽകിയിട്ടുണ്ട്. 

വക്കീൽ ഓഫിസിൽ നിന്ന് പ്രതിയെ അറസ്റ്റ് ചെയ്യാൻ അനുവദിക്കില്ലെന്നാണ് ബാർ അസോസിയേഷൻ സെക്രട്ടറി അടക്കമുള്ള അഭിഭാഷകർ പ്രതികരിച്ചത്. അത് വലിയ പ്രശ്‌നങ്ങൾക്ക് വഴിവെക്കുമെന്നും അവർ ചൂണ്ടിക്കാട്ടുന്നു. ബെയ്‌ലിൻ ദാസിനെ ബാർ അസോസിയേഷൻ സസ്‌പെൻഡ് ചെയ്തിട്ടുണ്ട്. 

അതിനിടെ, കേസിലെ പ്രതിയായ അഡ്വ. ബെയ്‌ലിൻ ദാസ് മുൻകൂർ ജാമ്യത്തിനായി നീക്കം തുടങ്ങിയിട്ടുണ്ട്. തിരുവനന്തപുരം ജില്ല സെഷൻസ് കോടതിയിലാണ് മുൻകൂർ ജാമ്യപേക്ഷ നൽകുക. ഓഫിസിൽ ഉണ്ടായ വാക്കുതർക്കത്തിൽ തനിക്കാണ് ആദ്യം മർദനമേറ്റതെന്ന വാദം ബെയ്‌ലിൻ ഉന്നയിക്കുമെന്നാണ് സൂചന. സംഭവം പുറത്തു വന്നതിന് പിന്നാലെ ഒളിവിൽ പോയിരിക്കുകയാണ് ബെയ്‌ലിൻ ദാസ്. 

ചൊവ്വാഴ്ചയാണ് വഞ്ചിയൂരിൽ ജൂനിയർ അഭിഭാഷക ശ്യാമിലിയെ മുതിർന്ന അഭിഭാഷകനായ ബെയ്‌ലിൻ ദാസ് ക്രൂരമായി മർദ്ദിച്ചത്. ജോലിയിൽ നിന്ന് അകാരണമായി പറഞ്ഞുവിട്ടത് ചോദ്യം ചെയ്തപ്പോഴാണ് സീനിയർ അഭിഭാഷകൻ മർദിച്ചതെന്ന് ശ്യാമിലി പറയുന്നു.

കഴിഞ്ഞ വ്യാഴാഴ്ചയാണ് ജോലിയിൽ നിന്ന് പറഞ്ഞുവിട്ടത്. എന്നാൽ, വെള്ളിയാഴ്ച ജോലിയിൽ തിരികെ പ്രവേശിക്കാൻ അഭിഭാഷകൻ ആവശ്യപ്പെട്ടു. തുടർന്നാണ് തിരിച്ചെത്തിയത്. ഇതിനുശേഷം ജോലിയിൽ നിന്ന് പറഞ്ഞുവിടാനുണ്ടായ സാഹചര്യം പറയണമെന്ന് ആവശ്യപ്പെട്ടതിന് പിന്നാലെ  അങ്ങനെ ചോദിക്കാൻ ആയോ എന്ന് ചോദിച്ച് മുഖത്ത് ആഞ്ഞടിക്കുകയായിരുന്നെന്നും ശ്യാമിലി പറഞ്ഞു. 

അഞ്ച് മാസം ഗർഭിണി ആയിരുന്ന സമയത്തും ബെയ്‌ലിൻ ദാസ് തന്നെ മർദിച്ചിരുന്നുവെന്ന് ശ്യാമിലി ആരോപിക്കുന്നു. സീനിയർ ആയതു കൊണ്ടാണ് പരാതി നൽകാതിരുന്നതെന്നും അവർ കൂട്ടിച്ചേർത്തു.

Junior lawyer Shyamili Justin alleges brutal assault by senior advocate Baylin Das at Vanchiyoor court. The Kerala Bar Council has suspended Das as legal and police complaints proceed.