ന്യൂഡല്‍ഹി: സുപ്രീം കോടതിയുടെ 52ാമത് ചീഫ് ജസ്റ്റിസായി ജസ്റ്റിസ് ബിആര്‍ ഗവായ് ഇന്ന് ചുമതലയേല്‍ക്കും. രാഷ്ട്രപതി ഭവനില്‍ രാവിലെ 10 മണിക്കാണ് സത്യപ്രതിജ്ഞ ചടങ്ങുകള്‍ ആരംഭിക്കുക. രാജ്യത്തിന്റെ ചരിത്രത്തില്‍ ആദ്യമായാണ് ബുദ്ധമത വിശ്വാസിയായ ഒരാള്‍ ചീഫ് ജസ്റ്റിസ് പദവിയിലെത്തുന്നത്. 

മാത്രമല കെജി ബാലകൃഷ്ണന് ശേഷം ചീഫ് ജസ്റ്റിസാവുന്ന രണ്ടാമത്തെ ദലിത് വ്യക്തിയാണ് ഇദ്ദേഹം. രാഷ്ട്രപതി ദ്രൗപതി മുര്‍മു സത്യാവാചകം ചൊല്ലി കൊടുക്കും. ഈ വര്‍ഷം നവംബര്‍ 23 വരെയാണ് പുതിയ ചീഫ് ജസ്റ്റിസിന്റെ കാലാവധി. 

1960ല്‍ മഹാരാഷ്ട്രയിലാണ് ഭൂഷണ്‍ രാമകൃഷ്ണ ഗവായ് എന്ന ബിആര്‍ ഗവായ് ജനിച്ചത്. പ്രശസ്ത സാമൂഹിക പ്രവർത്തകനും മുൻ ഗവർണറുമായിരുന്ന ആർ എസ് ഗവായിയുടെ മകനാണ് ഇദ്ദേഹം. 1985ൽ മുൻ അഡ്വക്കേറ്റ് ജനറലും ഹൈക്കോടതി ജഡ്ജിയുമായ രാജ എസ് ബോൺസാലെയുടെ കീഴിൽ നിയമപരിശീലനം ആരംഭിച്ചു. 1987 മുതൽ ബോംബെ ഹൈക്കോടതിയിൽ സ്വതന്ത്രമായി പ്രാക്ടീസ് ചെയ്ത അദ്ദേഹം, 1990 മുതൽ നാഗ്പൂർ ബെഞ്ചിൽ ശ്രദ്ധ കേന്ദ്രീകരിച്ചു. നാഗ്പൂർ, അമരാവതി മുനിസിപ്പൽ കോർപ്പറേഷനുകൾ, അമരാവതി സർവകലാശാല, സികോം തുടങ്ങിയ സ്ഥാപനങ്ങളെ പ്രതിനിധീകരിച്ചിട്ടുണ്ട്.

1992ൽ ബോംബെ ഹൈക്കോടതിയുടെ നാഗ്പൂർ ബെഞ്ചിൽ അസിസ്റ്റന്റ് ഗവൺമെന്റ് പ്ലീഡറായും 2000ൽ ഗവൺമെന്റ് പ്ലീഡറും പബ്ലിക് പ്രോസിക്യൂട്ടറുമായും നിയമിതനായി. 2003 നവംബർ 14ന് ബോംബെ ഹൈക്കോടതിയിൽ അഡീഷണൽ ജഡ്ജിയായും 2005 നവംബർ 12ന് സ്ഥിരം ജഡ്ജിയായും നിയമിതനായി. 2019 മെയ് 24ന് സുപ്രീം കോടതി ജഡ്ജിയായി ഉയർത്തപ്പെട്ടു.

സുപ്രീം കോടതിയിലെ മുതിർന്ന ജഡ്ജിയെ ചീഫ് ജസ്റ്റിസായി നിയമിക്കുന്ന കീഴ്വഴക്കപ്രകാരം, 2025 ഏപ്രിൽ 16ന് ജസ്റ്റിസ് സഞ്ജീവ് ഖന്ന ജസ്റ്റിസ് ഗവായിയെ ശുപാർശ ചെയ്തു. പ്രസിഡന്റ് ദ്രൗപതി മുർമു ഈ ശുപാർശ അംഗീകരിച്ച് നിയമനം നടത്തി.