ദുബൈയിലെ ബര്‍ഷ ഹൈറ്റ്‌സിലെ അപ്പാര്‍ട്ട്‌മെന്റില്‍ നിന്ന് ആയിഷ ഫൗസുലിനെയും 15 വയസ്സുള്ള മകള്‍ മറിയത്തെയും ഇറക്കിവിടേണ്ട ദിവസമായിരുന്നു ഇന്നലെ. വാടക കുടിശ്ശിക കുന്നുകൂടുകയും വൈദ്യുതി വിച്ഛേദിക്കപ്പെടുകയും ചെയ്തതോടെ, അമ്മയും മകളും എവിടേക്ക് പോകുമെന്ന് അറിയാത്ത അവസ്ഥയിലായിരുന്നു.

എന്നാല്‍ പ്രമുഖ യുഎഇ മാധ്യമമായ ഖലീജ് ടൈംസ് ഇവരുടെ കഥ പ്രസിദ്ധീകരിച്ച് 24 മണിക്കൂറിനുള്ളില്‍ എല്ലാം മാറി. യുഎഇയിലുടനീളമുള്ള ഉദാരമനസ്‌കരായ മനുഷ്യരുടെ ഇടപെടലിന്റെ ഫലമായി വൈദ്യുതി പുനഃസ്ഥാപിക്കുക മാത്രമല്ല, കുടിശ്ശികയുള്ള വാടകയും നല്‍കി. രണ്ടംഗ കുടുംബത്തിന് ഇപ്പോള്‍ ആശ്വാസമായിരിക്കുകയാണ്.

'എനിക്കിത് ഇപ്പോഴും വിശ്വാസമായില്ല,' ആയിഷ ഖലീജ് ടൈംസിനോട് പറഞ്ഞു. 'രണ്ട് ദിവസം മുമ്പ്, എങ്ങോട്ട് പോകണമെന്ന് അറിയാതെ ഞാന്‍ ഇരുട്ടില്‍ ഇരിക്കുകയായിരുന്നു. ഈ രാജ്യത്തെ ജനങ്ങളോട് എത്ര നന്ദി പറഞ്ഞാലും മതിയാകില്ല. ഇതൊരു അത്ഭുതം പോലെ തോന്നുന്നു.' ആയിഷ പറഞ്ഞു.

ഇവരുടെ ബില്ലുകള്‍ അടയ്ക്കാന്‍ സഹായിക്കുന്നതിനായി താമസക്കാര്‍ ഇതുവരെ ആകെ 50,000 ദിര്‍ഹം സമാഹരിച്ചുകഴിഞ്ഞു. ഖലീജ് ടൈംസുമായി നേരത്തെ ബന്ധപ്പെട്ടിരുന്ന അവരുടെ മകള്‍ മറിയവും ഇതേ വികാരം പ്രകടിപ്പിച്ചു. 

'ഒടുവില്‍ എനിക്ക് വിഷമിക്കാതെ പഠിക്കാന്‍ കഴിയും. വീണ്ടും ശുദ്ധവായു ശ്വസിക്കാന്‍ കഴിയുമെന്ന് എനിക്ക് തോന്നുന്നു.' മറിയം പറഞ്ഞു.

2008ല്‍ ഇസ്‌ലാം മതം സ്വീകരിച്ച ആയിഷ, പുതിയൊരു ജീവിതം കെട്ടിപ്പടുക്കുക എന്ന പ്രതീക്ഷയോടെയാണ് യുഎഇയിലേക്ക് താമസം മാറിയത്. എന്നാല്‍ പരാജയമായ ദാമ്പത്യജീവിതവും തിരിച്ചടയ്ക്കാത്ത കടങ്ങള്‍ മൂലമുണ്ടായ യാത്രാ വിലക്കും കാരണം ജീവിതത്തിന്റെ രണ്ടറ്റവും കൂട്ടിമുട്ടിക്കാന്‍ അവര്‍ പാടുപെടുകയായിരുന്നു.

ഇവര്‍ക്കുവേണ്ടി യുഎഇയുടെ എല്ലാ കോണുകളില്‍ നിന്നും വലിയ സഹായപ്രവാഹം ഉണ്ടായി. അബൂദബി, ഷാര്‍ജ, അജ്മാന്‍, റാസല്‍ഖൈമ എന്നിവിടങ്ങളില്‍ നിന്നുള്ള താമസക്കാര്‍ സഹായം വാഗ്ദാനം ചെയ്തു. പേര് വെളിപ്പെടുത്താന്‍ ആഗ്രഹിക്കാത്ത ഒരു ദുബൈ നിവാസി കുടിശ്ശികയുള്ള യൂട്ടിലിറ്റി ബില്ലുകള്‍ പൂര്‍ണ്ണമായും അടച്ചു. 7,000 ദിര്‍ഹത്തിന്റെ ബില്ലുകളാണ് ഇദ്ദേഹം അടച്ചത്.

അടിയന്തര പ്രതിസന്ധി ഒഴിവായതോടെ, തന്റെ ജീവിതം വീണ്ടും കരു പിടിപ്പിക്കാന്‍ ആകുമെന്ന പ്രതീക്ഷയിലാണ് ആയിഷ ഇപ്പോള്‍. 

'ഇനി ഒരിക്കലും ഇങ്ങനെ സംഭവിക്കരുതെന്ന് ഞാന്‍ ആഗ്രഹിക്കുന്നു,' അവര്‍ പറഞ്ഞു.

In a heartwarming act of kindness, UAE residents raised Dh50,000 through charity efforts to prevent the eviction of a struggling mother and daughter. The community’s support highlights the spirit of unity and compassion in the Emirates.