മലപ്പുറം: കഴിഞ്ഞ അധ്യയന വര്‍ഷത്തെ എല്‍എസ്എസ്, യുഎസ്എസ് പരീക്ഷകളുടെ ഫലം (Kerala LSS, USS scholarship result 2025) പ്രഖ്യാപിച്ചിട്ടും അറിയാനാകാതെ വിദ്യാര്‍ഥികളും രക്ഷിതാക്കളും. ഇന്നലെ വൈകീട്ട് നാലുമണിക്കാണ് എല്‍.എസ്.എസ്, യു.എസ്.എസ് ഫലം വിദ്യാഭ്യാസ വകുപ്പ് പുറത്തുവിട്ടത്. മുന്‍കൂട്ടി ഫലപ്രഖ്യാപന തീയതി അറിയിക്കാതെ പെട്ടെന്ന് ഫലം വെബ്‌സൈറ്റില്‍ അപ്ലോഡ് ചെയ്യുകയായിരുന്നു. 

റിസല്‍ട്ട് പുറത്തുവന്നതിനു പിന്നാലെ വെബ്‌സൈറ്റിന്റെ മെല്ലപ്പോക്ക് വിദ്യാര്‍ഥികളേയും രക്ഷിതാക്കളേയും വലച്ചു. ഫലമറിയാന്‍ സ്‌കൂളിലേക്ക് വിദ്യാര്‍ഥികളുടെ വിളിയെത്തിയതോടെ അധ്യാപകരും നെട്ടോട്ടത്തിലായി. 

രാത്രി ഏറെ വൈകിയും അധ്യാപകര്‍ ഫലമറിയാനുള്ള കാത്തിരിപ്പിലായിരുന്നു. ഒരേ സ്‌കൂളില്‍ തന്നെ ഒന്നോ രണ്ടോ പേരുടെ ഫലം ലഭ്യമായപ്പോള്‍ മറ്റുള്ളവരുടെ ഫലമറിയാന്‍ കാത്തിരിക്കേണ്ട അവസ്ഥയാണ് ഉണ്ടായതെന്ന് അധ്യാപകര്‍ പറയുന്നു. 

നാലര ലക്ഷം വിദ്യാര്‍ഥികളാണ് കഴിഞ്ഞ തവണ പരീക്ഷയെഴുതിയത്. മാസങ്ങളോളം പ്രത്യേക ക്ലാസുകളും കോച്ചിങ് ക്യാംപുകളും സംഘടിപ്പിച്ചാണ് എല്‍.എസ്.എസ്, യു.എസ്.എസ് പരീക്ഷകള്‍ക്ക് വിദ്യാര്‍ഥികളെ ഓരോ സ്‌കൂളും സജ്ജരാക്കിയത്. സര്‍ക്കാര്‍ സംവിധാനത്തില്‍ കുറ്റമറ്റ രീതിയില്‍ നടപ്പാക്കേണ്ട മത്സര പരീക്ഷാ ഫലം പ്രഖ്യാപിക്കുന്നതിലുള്ള വിദ്യാഭ്യാസ വകുപ്പിന്റെ വീഴ്ച കുട്ടികളെ മാനസിക സമ്മര്‍ദ്ദത്തിലാക്കാനാണ് കാരണമാവുകയെന്ന് അധ്യാപകര്‍ പറയുന്നു.

എസ്.എസ്.എല്‍.സി, പ്ലസ്ടു പരീക്ഷാ ഫലം പുറത്തുവരുന്ന തീയതി മുന്‍കൂട്ടി അറിയിച്ച് അന്നേദിവസം കൃത്യമായി വിദ്യാഭ്യാസമന്ത്രിമാര്‍ പ്രഖ്യാപിക്കുന്ന രീതിയാണ് നിലവിലുള്ളത്. എന്നാല്‍ സംസ്ഥാനത്തെ കുട്ടികളുടെ ഏറ്റവും വലിയ മത്സരപ്പരീക്ഷയായ എല്‍.എസ്.എസ്, യു.എസ്.എസ് പരീക്ഷയോട് സര്‍ക്കാരിന് ഈ സമീപനം ഇല്ല. https://bpekerala.in/ എന്നതാണ് ഫലം അറിയുന്ന സൈറ്റ്. ഇതാകട്ടെ മുഴുവനായും ബിസിയാണ്. എസ്.എസ്.എല്‍.സി, പ്ലസ്ടു ഫലം പോലെ എല്‍.എസ്.എസ്, യു.എസ്.എസ് പരീക്ഷാ ഫലം അറിയാന്‍ മറ്റൊരു സൈറ്റ് സര്‍ക്കാര്‍ നല്‍കുന്നുമില്ല.

Students and parents are still not get result even after LSS-USS results were announced