കോഴിക്കോട്: വടകരയിൽ സ്കൂൾ അധ്യാപികയിൽ നിന്ന് കൈക്കൂലി വാങ്ങുന്നതിനിടെ പ്രധാനാധ്യാപകൻ വിജിലൻസിന്റെ പിടിയിൽ. പാക്കയിൽ ജെബി സ്കൂൾ പ്രധാനാധ്യാപകൻ ഇ.എം. രവീന്ദ്രനാണ് കോഴിക്കോട് വിജിലൻസ് ഡിവൈഎസ്പി പി. ബിജുവിന്റെ നേതൃത്വത്തിലുള്ള സംഘത്തിന്റെ പിടിയിലായത്.

ജനറൽ പ്രൊവിഡന്റ് ഫണ്ട് എൻആർഎ അപേക്ഷ ഫോർവേർഡ് ചെയ്യുന്നതിന് രവീന്ദ്രൻ ഒരു ലക്ഷം രൂപ കൈക്കൂലിയായി ആവശ്യപ്പെട്ടിരുന്നു. ഇതിൽ 90,000 രൂപയുടെ ചെക്ക് അധ്യാപിക നൽകിയിരുന്നു. ബാക്കി 10,000 രൂപ വടകര ലിങ്ക് റോഡിൽ വെച്ച് കൈമാറുന്നതിനിടെയാണ് വിജിലൻസ് സംഘം ഇയാളെ കസ്റ്റഡിയിലെടുത്തത്.

ഈ മാസം അവസാനം വിരമിക്കാനിരിക്കെ രവീന്ദ്രൻ കൈക്കൂലി കേസിൽ കുടുങ്ങുകയായിരുന്നു. വിജിലൻസ് സംഘം കേസിൽ തുടർ അന്വേഷണം നടത്തിവരികയാണ്.