ന്യൂഡല്‍ഹി: പാക് ഭീകരപ്രവര്‍ത്തനങ്ങള്‍ ലോകരാജ്യങ്ങള്‍ക്കിടയില്‍ തുറന്നുകാട്ടാന്‍ പ്രതിനിധി സംഘങ്ങളെ നിയോഗിക്കാന്‍ കേന്ദ്ര സര്‍ക്കാര്‍. പ്രതിനിധി സംഘത്തില്‍ മുതിര്‍ന്ന കോണ്‍ഗ്രസ് നേതാവ് ശശി തരൂരുമുണ്ട്. തരൂരിനെ കൂടാതെ ഇന്ത്യാ മുന്നണിയിലെ വിവിധ പാര്‍ട്ടി നേതാക്കളും സംഘത്തില്‍ ഉണ്ട്. 

ഇന്ത്യ-പാക് സംഘര്‍ഷവുമായി ബന്ധപ്പെട്ട് കോണ്‍ഗ്രസ് നിലപാടിനു വിരുദ്ധമായി അഭിപ്രായ പ്രകടനം നടത്തിയ തരൂരിനെ കോണ്‍ഗ്രസ് ദേശീയ നേതൃത്വം താക്കീതു ചെയ്‌തെന്ന് റിപ്പോര്‍ട്ടുകള്‍ ഉണ്ടായിരുന്നു. ഇതിനു തൊട്ടുപിന്നാലെയാണ് തരൂരിനെ പ്രനിധി സംഘത്തില്‍ ഉള്‍പ്പെടുത്തിയത്. പ്രതിനിധി സംഘങ്ങളില്‍ ഒന്നിനെ തരൂര്‍ നയിക്കുമെന്നും റിപ്പോര്‍ട്ടുകള്‍ ഉണ്ട്. കോണ്‍ഗ്രസ് നേതൃത്വം താക്കീതു ചെയ്‌തെന്ന തരത്തിലുള്ള വാര്‍ത്തകള്‍ കഴിഞ്ഞ ദിവസം ശശി തരൂര്‍ നിഷേധിച്ചിരുന്നു.

30 അംഗങ്ങള്‍ അടങ്ങിയ പ്രതിനിധി സംഘം അടുത്ത ആഴ്ചയായിരിക്കും സന്ദര്‍ശനം ആരംഭിക്കുക. തരൂരിനെ കൂടാതെ മുതിര്‍ന്ന കോണ്‍ഗ്രസ് നേതാക്കളായ മനീഷ് തിവാരിയും സല്‍മാന്‍ ഖുര്‍ഷിദും അമര്‍ സിങ്ങും സംഘത്തിലുണ്ടാകും. 

ബിജെപി നേതാക്കലായ അനുരാഗ് ഠാക്കൂറും അപരാജിത സാംരഗിയും സിപിഎം നേതാവും കേരളത്തില്‍ നിന്നുള്ള രാജ്യസഭാംഗവുമായ ജോണ്‍ ബ്രിട്ടാസും എഐഎംഐഎം നേതാവ് അസദുദ്ദീന്‍ ഉവൈസിയും എന്‍സിപി(എസ്പി) നേതാവ് സുപ്രിയ സുലെയും ഡിഎംകെ നേതാവ് കെ കനിമൊഴിയും സംഘത്തിലുണ്ട്.