ജയ്പൂർ: ഇന്ത്യ-പാകിസ്താൻ സംഘർഷങ്ങൾക്ക് പിന്നാലെ ഐപിഎൽ നിർത്തിവെച്ചിരുന്നു. ഇപ്പോൾ ഇരു രാജ്യങ്ങളും വെടിനിർത്തൽ സ്ഥിരീകരിച്ചതിന് പിന്നാലെ വീണ്ടും ഐപിഎൽ പുനരാംഭിക്കാൻ തീരുമാനമായിരിക്കുകയാണ്. മെയ് 17 മുതലാണ് ഐപിഎൽ വീണ്ടും തുടങ്ങുന്നത്. മെയ് 18ന് നടക്കുന്ന മത്സരത്തിൽ പഞ്ചാബ് കിങ്‌സും രാജസ്ഥാൻ റോയൽസുമാണ് നേർക്കുനേർ എത്തുന്നത്. രാജസ്ഥാന്റെ തട്ടകമായ ജയ്പൂരിലെ സവായ് മാൻസിങ്ങ് സ്റ്റേഡിയത്തിലാണ് മത്സരം നടക്കുക. മത്സരത്തിൽ രാജസ്ഥാൻ നായകൻ സഞ്ജു സാംസൺ മടങ്ങിയെത്തും. 

ഈ മത്സരത്തിൽ രാജസ്ഥാൻ റോയൽസ് നായകൻ സഞ്ജു സാംസണിന് ടി-20യിലെ ഒരു പുതിയ നാഴികക്കല്ല് സ്വന്തമാക്കാൻ സാധിക്കും. മത്സരത്തിൽ മൂന്ന് സിക്‌സറുകൾ കൂടി നേടിയാൽ ടി-20യിൽ 350 സിക്‌സറുകൾ പൂർത്തിയാക്കാൻ സഞ്ജുവിന് സാധിക്കും. 347 സിക്സുകളാണ് സഞ്ജു ഇതുവരെ ടി-20യിൽ അടിച്ചെടുത്തിട്ടുള്ളത്. മൂന്ന് ഇന്ത്യൻ താരങ്ങൾക്ക് മാത്രമേ ടി-20യിൽ 350 സിക്സുകൾ പൂർത്തിയാക്കാൻ സാധിച്ചിട്ടുള്ളൂ. രോഹിത് ശർമ്മ, വിരാട് കോഹ്‌ലി, സൂര്യകുമാർ യാദവ് എന്നിവരാണ് ഇതിനു മുമ്പ് ഈ നേട്ടം കൈവരിച്ചിട്ടുള്ളത്. 

 

അതേസമയം ഈ സീസണിൽ ഡൽഹി ക്യാപ്പിറ്റൽസിനെതിരായ മത്സരത്തിൽ പരുക്കേറ്റ് സഞ്ജു പുറത്തായിരുന്നു. മത്സരത്തിൽ റിട്ടയേർഡ് ഹാർട്ടായാണ് സഞ്ജു മടങ്ങിയത്. മത്സരത്തിൽ 19 പന്തിൽ 31 റൺസായിരുന്നു സഞ്ജു നേടിയിരുന്നത്. രണ്ട് ഫോറുകളും ഒരു സിക്‌സും നേടിക്കൊണ്ട് മിന്നും ഫോമിൽ തുടരവെയാണ് സഞ്ജുവിനു ഈ തിരിച്ചടി നേരിടേണ്ടി വന്നത്. ഇതോടെ രാജസ്ഥാൻ റോയൽസിന്റെ ചരിത്രത്തിൽ ആദ്യമായി പരുക്കേറ്റ് റിട്ടയർഡ് ഹർട്ട് ആവുന്ന താരമായും സഞ്ജു മാറി. 

Sanju Samson Need Three Six To Create A Historical Record In T20 Cricket