മാഡ്രിഡ്: ഇസ്‌റാഈലിനെ 'വംശഹത്യാ രാഷ്ട്രം' എന്ന് വിശേഷിപ്പിച്ച് സ്പാനിഷ് പ്രധാനമന്ത്രി പെഡ്രോ സാഞ്ചസ്. അവരുമായി തങ്ങള്‍ വ്യാപാരം നടത്തില്ലെന്നും അദ്ദേഹം പറഞ്ഞു. 

മെയ് 14ന് മാഡ്രിഡില്‍ നടന്ന ഒരു പാര്‍ലമെന്ററി ചോദ്യോത്തര വേളയില്‍, ഗസ്സയില്‍ ഇസ്‌റാഈല്‍ കൂട്ടക്കുരുതി തുടരുമ്പോഴും സ്‌പെയിന്‍ ഇസ്‌റാഈലുമായി വ്യാപാര ബന്ധം നിലനിര്‍ത്തുന്നുവെന്ന് ആരോപിച്ച കറ്റാലന്‍ എംപി ഗബ്രിയേല്‍ റൂഫിയാന്റെ വിമര്‍ശനത്തിന് മറുപടി പറയുമ്പോഴാണ് സാഞ്ചസ് ഇസ്‌റാഈലിനെ തുറന്നുകാട്ടിയത്.  

'മിസ്റ്റര്‍ റൂഫിയാന്‍, ഒരു കാര്യം ഞാന്‍ വ്യക്തമാക്കട്ടെ. ഞങ്ങള്‍ ഒരു വംശഹത്യ രാഷ്ട്രവുമായി ഇടപാടുകള്‍ നടത്തുന്നില്ല. ഞങ്ങള്‍ അങ്ങനെ ചെയ്യുന്നില്ല,' പെഡ്രോ സാഞ്ചസ് പറഞ്ഞു.

'കഴിഞ്ഞ ദിവസം, ഈ വേദിയില്‍ നിന്ന്, സത്യവുമായി പൊരുത്തപ്പെടാത്ത ചില കാര്യങ്ങള്‍ പരാമര്‍ശിച്ചപ്പോള്‍, ഞങ്ങള്‍ എന്താണ് പരാമര്‍ശിക്കുന്നതെന്ന് ഞാന്‍ കൃത്യമായി വിശദീകരിച്ചുവെന്ന് ഞാന്‍ വിശ്വസിക്കുന്നു,' അദ്ദേഹം കൂട്ടിച്ചേര്‍ത്തു.

റിപ്പോര്‍ട്ടുകള്‍ പ്രകാരം, ഗസ്സയിലെ ഇസ്‌റാഈല്‍ ആക്രമണങ്ങളെ വിവരിക്കാന്‍ സ്‌പെയിനിലെ തീവ്ര ഇടതുപക്ഷ പാര്‍ട്ടികള്‍ സാധാരണയായി ഉപയോഗിക്കുന്ന പദമാണ് 'വംശഹത്യ രാഷ്ട്രം' എന്നത്. എന്നാല്‍ പെഡ്രോ സാഞ്ചസ് ആദ്യമായാണ് പൊതുവേദിയില്‍ ഈ പദം ഉപയോഗിക്കുന്നത്.  

ഇതിനു മറുപടിയായി ഇസ്‌റാഈല്‍ വിദേശകാര്യ മന്ത്രാലയം ഇസ്‌റാഈലിലെ സ്പാനിഷ് അംബാസഡറെ വിളിച്ചുവരുത്തി ശാസിച്ചു എന്നാണ് റിപ്പോര്‍ട്ടുകള്‍.

2024 മെയ് മാസത്തില്‍, ഫലസ്തീനെ രാഷ്ട്രമായി അംഗീകരിക്കുന്ന 140ാമത്തെ രാജ്യമായി സ്‌പെയിന്‍ മാറിയിരുന്നു. ഒരു മാസത്തിനുശേഷം, ഗസ്സയ്‌ക്കെതിരായ ആക്രമണത്തില്‍ അന്താരാഷ്ട്ര നീതിന്യായ കോടതിയില്‍ ദക്ഷിണാഫ്രിക്ക ഫയല്‍ ചെയ്ത പരാതിയിന്മേല്‍ തങ്ങളും കക്ഷി ചേരുമെന്ന് സ്‌പെയിന്‍ അറിയിച്ചിരുന്നു.

Spain’s Prime Minister strongly condemns Israel, labeling it a genocidal state and announcing a halt to bilateral business dealings, marking a bold diplomatic stance amid the ongoing conflict.