ദോഹ: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിനെയും അദ്ദേഹത്തിന്റെ കൂടെയുണ്ടായിരുന്ന പ്രതിനിധി സംഘത്തെയും ആദരിക്കുന്നതിനായി ലുസൈല്‍ കൊട്ടാരത്തില്‍ അമീര്‍ ഷെയ്ഖ് തമീം ബിന്‍ ഹമദ് അല്‍താനി ഒരുക്കിയത് അത്യാഡംബര ഡിന്നര്‍. ട്രംപിന്റെ പശ്ചിമേഷ്യന്‍ സന്ദര്‍ശനത്തിന്റെ രണ്ടാം ദിവസമായ ഇന്നലെ വൈകീട്ടോടെയാണ് അദ്ദേഹം ഖത്തറിലെത്തിയത്. ദോഹ ഹമദ് ഇന്റര്‍നാഷനല്‍ വിമാനത്താവളത്തിലെത്തി അമീര്‍ ശൈഖ് തമീം ബിന്‍ ഹമദ് ആല്‍ഥാനി ട്രംപിനെ സ്വീകരിച്ചു. ട്രംപ് സഞ്ചരിച്ച എയര്‍ ഫോഴ്‌സ് വണ്‍ വിമാനത്തിന് ഖത്തര്‍ വിമാനം അകമ്പടി സേവിച്ചു.

വിരുന്നിനിടെ യുഎസ് പ്രസിഡന്റിനെയും പ്രതിനിധി സംഘത്തെയും സ്വാഗതം ചെയ്ത് അമീര്‍ സംസാരിച്ചു. ഇരു രാജ്യങ്ങളും തമ്മിലുള്ള ബന്ധം സൗഹൃദ ജനതയുടെ താല്‍പ്പര്യങ്ങള്‍ നിറവേറ്റുന്നതിനായി നിരന്തരം വികസിച്ചുകൊണ്ടിരിക്കുകയാണെന്ന് അദ്ദേഹം പറഞ്ഞു.

ഗാസ മുനമ്പിലെ യുദ്ധം അവസാനിപ്പിക്കാനും എല്ലാ സാധാരണക്കാരെയും, പ്രത്യേകിച്ച് സ്ത്രീകളെയും കുട്ടികളെയും സംരക്ഷിക്കാനും എല്ലാ ബന്ദികളുടെ മോചനം ഉറപ്പാക്കാനും ഇരു രാജ്യങ്ങളുടെയും സംയുക്ത നയതന്ത്ര ശ്രമങ്ങള്‍ അമീര്‍ സ്ഥിരീകരിച്ചു.

 

 

ഇരു രാജ്യങ്ങളും തമ്മില്‍ സുപ്രധാനമായ നിരവധി പ്രതിരോധ വാണിജ്യ കരാറുകളില്‍ ഒപ്പുവച്ചു. ഖത്തര്‍ എയര്‍വെയ്‌സ് യു.എസില്‍ നിന്ന് 160 ബോയിങ് വിമാനങ്ങള്‍ വാങ്ങുന്നതിന് ഒപ്പുവച്ച കരാറാണ് ഇതില്‍ പ്രധാനപ്പെട്ടത്. 20,000 കോടി ഡോളറിന്റെ കരാറിലാണ് ഇരു നേതാക്കളും ഒപ്പുവച്ചത്.

ശതകോടികളുടെ പ്രതിരോധ സഹകരണം, എം.ക്യു9ബി ആളില്ലാ വിമാനങ്ങള്‍ വാങ്ങുന്നത് തുടങ്ങിയ കരാറുകളിലും ഒപ്പുവച്ചു. പെന്റഗണ്‍ മേധാവി പീറ്റ് ഹെഗ്‌സതാണ് യു.എസിനു വേണ്ടി പ്രതിരോധ കരാറിലൊപ്പുവച്ചത്.
ഇരു രാജ്യങ്ങളും തമ്മിലെ ഉഭയകക്ഷിബന്ധം മറ്റൊരു നിലയിലേക്ക് ഉയര്‍ന്നതായി ട്രംപുമായുള്ള കൂടിക്കാഴ്ചയ്ക്കുശേഷം ഖത്തര്‍ അമീര്‍ പറഞ്ഞു. 2003ല്‍ ജോര്‍ജ് ഡബ്ല്യു ബുഷ് നടത്തിയ സന്ദര്‍ശനത്തിനു ശേഷം ഒരു യു.എസ് പ്രസിഡന്റ് ഖത്തര്‍ സന്ദര്‍ശിക്കുന്നത് ആദ്യമായാണ്. ഇന്ന് അബൂദബി സന്ദര്‍ശിക്കുന്ന ട്രംപ് അതു കഴിഞ്ഞ് തുര്‍ക്കിയിലേക്കു പോകും.

Amir hosts dinner banquet in honour of US President