ന്യൂഡല്‍ഹി: നിയമസഭകള്‍ പാസ്സാക്കുന്ന ബില്ലുകളില്‍ തീരുമാനം എടുക്കാന്‍  സമയപരിധി നിശ്ചയിച്ച് കൊണ്ടുള്ള സുപ്രിംകോടതി വിധിയില്‍ രൂക്ഷ പേരതികരണവുമായി രാഷ്ട്രപതി. ബില്ലുകളില്‍ തീരുമാനം എടുക്കാന്‍ ഗവര്‍ണര്‍മാര്‍ക്കും രാഷ്ട്രപതിക്കും സമയപരിധി നിശ്ചയിച്ച വിധിക്കെതിരെ ഹരജി നല്‍കിയിരിക്കുകയാണ് ദ്രൗപതി മുര്‍മു. ജസ്റ്റിസുമാരായ ജെ ബി പര്‍ദിവാലയും ആര്‍ മഹാദേവനും നല്‍കിയ 415 പേജുള്ള വിധി പുനഃപരിശോധിക്കണമെന്ന് ഹരജി ആവശ്യപ്പെടുന്നു. ഭരണഘടനയില്‍ ഇല്ലാത്ത സമയപരിധി കോടതിക്ക് നിര്‍വചിക്കാനാകുമോ എന്ന് രാഷ്ട്രപതി ഹരജിയില്‍ ചോദിക്കുന്നു. ഗവര്‍ണര്‍ക്കും രാഷ്ട്രപതിക്കും മുന്‍പാകെ ഒരു ബില്ല് വന്നാല്‍ എന്തൊക്കെ കാര്യങ്ങള്‍ ചെയ്യാമെന്നതിലും അവര്‍ വിശദീകരണം തേടി. ഇതുള്‍പെടെ  14 ചോദ്യങ്ങള്‍ രാഷ്ട്രപതി ഹരജിയില്‍ ഉന്നയിക്കുന്നുണ്ട്. ഈ കാര്യങ്ങളിലെല്ലാം കോടതി വ്യക്തത വരുത്തണമെന്നും ദ്രൗപതി മുര്‍മു ആവശ്യപ്പെട്ടു.

സുപ്രിം കോടതിയോട് രാഷ്ട്രപതി വ്യക്തത തേടിയ കാര്യങ്ങള്‍ 

1. ബില്ലുകള്‍ ലഭിക്കുമ്പോള്‍ ഭരണഘടനയുടെ 200ാം അനുച്ഛേദ പ്രകാരം ഗവര്‍ണര്‍മാര്‍ക്ക് മുന്നിലുള്ള ഭരണഘടനപരമായ സാധ്യതള്‍ എന്തൊക്കെ?

2. നിയമസഭകള്‍ പാസാക്കിയ ബില്ലുകളില്‍ തീരുമാനമെടുക്കുന്ന കാര്യത്തില്‍ മന്ത്രിസഭയുടെ സഹായവും ഉപദേശവും അനുസരിച്ച് പ്രവര്‍ത്തിക്കാന്‍ ഗവര്‍ണര്‍മാര്‍ ബാധ്യസ്ഥരാണോ?

3. 200ാം അനുച്ഛേദപ്രകാരം വിവേചനാധികാരം ഗവര്‍ണര്‍മാര്‍ പ്രയോഗിക്കുന്നത് ന്യായമല്ലേ

4. ആര്‍ട്ടിക്കിള്‍ 200 പ്രകാരമുള്ള ഗവര്‍ണറുടെ തീരുമാനങ്ങളെ കോടതി അവലോകനത്തില്‍ നിന്ന് ആര്‍ട്ടിക്കിള്‍ 361 പൂര്‍ണ്ണമായും സംരക്ഷിക്കുന്നുണ്ടോ?

5. ബില്ലുകളില്‍ തീരുമാനമെടുക്കാന്‍ ഗവര്‍ണര്‍മാര്‍ക്ക് ഭരണഘടനയില്‍ സമയപരിധി നിശ്ചയിച്ചില്ലാത്തതിനാല്‍ ഇത്തരമൊരു നിര്‍ദേശം നല്‍കാന്‍ കോടതികള്‍ക്ക് എങ്ങനെ കഴിയും.

6. 201 ാം അനുച്ഛേദ പ്രകാരമുള്ള രാഷ്ട്രപതിയുടെ വിവേചനാധികാരം ന്യായമല്ലേ ?

7. ബില്ലുകളില്‍ തീരുമാനമെടുക്കുന്നതില്‍ ഭരണഘടന രാഷ്ട്രപതിക്ക് സമയപരിധി നിശ്ചയിക്കുന്നില്ല. പിന്നെ കോടതികള്‍ എങ്ങനെ ഇത്തരമൊരു നിര്‍ദേശം നല്‍കും

8.ഗവര്‍ണര്‍മാര്‍ അയക്കുന്ന ബില്ലുകളില്‍ 143ാം അനുച്ഛേദ പ്രകാരം രാഷ്ട്രപതി സുപ്രിം കോടതിയുടെ അഭിപ്രായം തേടേണ്ടതുണ്ടോ

9.ബില്ലുകള്‍ നിയമം ആകുന്നതിന് മുമ്പ് ഉള്ളടക്കം ജുഡീഷ്യല്‍ പരിശോധനക്ക് വിധേയമാക്കാന്‍ കോടതികള്‍ക്ക് അധികാരമുണ്ടോ

10.രാഷ്ട്രപതിയുടേയും ഗവര്‍ണര്‍മാരുടേയും ഭരണഘടന അധികാരങ്ങള്‍ ആര്‍ട്ടിക്കിള്‍ 142 പ്രകാരം മറികടക്കാന്‍ കോടതികള്‍ക്ക് അധികാരമുണ്ടോ

11. നിയമസഭ പാസ്സാക്കുന്ന ബില്‍ ഗവര്‍ണറുടെ അംഗീകാരം ഇല്ലാതെ നിയമമായി മാറുമോ

12. ഭരണഘടന വ്യഖ്യാനിക്കുന്ന വിഷയങ്ങള്‍ സുപ്രിംകോടതിയുടെ ഭരണഘടന ബെഞ്ചല്ലേ പരിഗണിക്കേണ്ടത്

13. മൗലികാവകാശ ലംഘനം ഉണ്ടാവുമ്പോള്‍ സുപ്രിം കോടതിയെ നേരിട്ട് സമീപിക്കാന്‍ അവസരം നല്‍കുന്ന 32ാം അനുച്ഛേദ പ്രകാരം കേന്ദ്രസര്‍ക്കാറിനെതിരെ സംസ്ഥാനങ്ങള്‍ക്ക് ഹരജി നല്‍കാന്‍ ആവുമോ.

14.സംസ്ഥാനങ്ങള്‍ കേന്ദ്രസര്‍ക്കാറിനെതിരെ ആര്‍ട്ടിക്കിള്‍ 131 പ്രകാരം സ്യൂട്ട് ഹരജി അല്ലേ നല്‍കേണ്ടത്

തമിഴ് നാട് ഗവര്‍ണര്‍ കേസിലാണ് നിയമസഭകള്‍ പാസ്സാക്കുന്ന ബില്ലുകളില്‍ തീരുമാനം എടുക്കുന്നതിന് രാഷ്ട്രപതിക്കും, ഗവര്‍ണര്‍മാര്‍ക്കും സമയ പരിധി നിശ്ചയിച്ച് കൊണ്ടുള്ള ഉത്തരവ് സുപ്രിം കോടതി പുറപ്പെടുവിച്ചത്. രാഷ്ട്രപതി ബില്ലുകളില്‍ അംഗീകാരം നല്‍കുന്നതുമായി ബന്ധപ്പെട്ട് മുന്‍പ് സുപ്രിംകോടതി വ്യത്യസ്ത വിധികള്‍ പുറപ്പെടുവിച്ചിട്ടരുന്നു.  ഈ സാഹചര്യം കൂടി മുന്‍നിര്‍ത്തിയാണ് രാഷ്ട്രപതിയുടെ റഫറന്‍സ്.

President Droupadi Murmu has filed a review petition against the Supreme Court's verdict that imposed a time limit on Governors and the President for deciding on bills passed by state legislatures.