ദുബൈ: പ്രവാസി മലയാളികള്‍ക്ക് ഏറ്റവും പ്രിയപ്പെട്ടതും ലോകത്തിലെ തന്നെ ഏറ്റവും തിരക്കേറിയതുമായ ദുബൈ അന്താരാഷ്ട്ര വിമാനത്താവളം(DXB) അടച്ചുപൂട്ടുമെന്ന് ഔദ്യോഗിക പ്രഖ്യാപനം. 2032ഓടെയാകും ദുബൈ അന്താരാഷ്ട്ര വിമാനത്താവളം അടച്ചുപൂട്ടുക. ദുബൈയില്‍ നിര്‍മാണ പ്രവൃത്തികള്‍ നടന്നുകൊണ്ടിരിക്കുന്ന അല്‍മക്തൂം വിമാനത്താവളത്തിന്റെ ആദ്യഘട്ടം 2032ഓടെ പൂര്‍ത്തിയാകുമെന്നാണ് കരുതുന്നത്. പുതിയ വിമാനത്താവളം നിലവില്‍ വരുന്നതോടെ ദുബൈയുടെ ആധുനിക ചരിത്രത്തോട് ചേര്‍ന്നുനടന്ന ദുബൈ അന്താരാഷ്ട്ര വിമാനത്താവളം ചരിത്രത്തിന്റെ താളുകളില്‍ വിശ്രമിക്കും. 

എമിറേറ്റിന്റെയും ദുബൈ നഗരത്തിന്റെയും ഭാവിയെക്കുറിച്ചുള്ള വലിയ ചര്‍ച്ചകള്‍ക്കാണ് അധികൃതരുടെ ഈ തീരുമാനം തിരികൊളുത്തിയിരിക്കുന്നത്. നിലവില്‍ 29 ചതുരശ്ര കിലോമീറ്ററില്‍ വ്യാപിച്ചുകിടക്കുന്ന DXBയുടെ സ്ഥലം ഭവന, വാണിജ്യ, പരസ്യ ആവശ്യങ്ങള്‍ക്കായി പുനര്‍വിനിയോഗിക്കാന്‍ സാധ്യതയുണ്ടെന്ന് റിപ്പോര്‍ട്ടുകള്‍ സൂചിപ്പിക്കുന്നു.

താമസ, വ്യാപാര, ഹോസ്പിറ്റാലിറ്റി, പൊതു ഇടങ്ങള്‍ എന്നിവ സംയോജിപ്പിച്ച് ഒരുങ്ങുന്ന നഗരവികസന മാതൃകക്കാണ് സാധ്യത കല്‍പ്പിക്കപ്പെടുന്നത്. നഗരത്തിന്റെ മാറുന്ന ആവശ്യങ്ങള്‍, ജനസംഖ്യാ വളര്‍ച്ച, ഗതാഗത മാതൃകകളുടെ മാറ്റം എന്നിവയെ അടിസ്ഥാനമാക്കി ഡേറ്റാ അനാലിറ്റിക്‌സ് ഉപയോഗിച്ചുള്ള പദ്ധതിയാണ് ഇവിടെ നടപ്പിലാകേണ്ടതെന്ന് നഗര പദ്ധതിവിദഗ്ധര്‍ നിര്‍ദേശിക്കുന്നു.

വിമാനത്താവളം അടച്ചുപൂട്ടുന്ന പക്ഷവും ദുബൈയുടെ വികസനത്തിലും പുരോഗതിയിലും അന്താരാഷ്ട്ര വിമാനത്താവളം വഹിച്ച ചരിത്രപരമായ പങ്ക് വിസ്മരിക്കപ്പെടരുതെന്ന് യുഎഇയിലെ പ്രവാസികളായ പലരും ഭരണകൂടത്തോട് അഭ്യര്‍ത്ഥിച്ചു.

പുതിയതായ നിര്‍മിക്കുന്ന അല്‍മക്തൂം അന്താരാഷ്ട്ര വിമാനത്താവളത്തില്‍ 128 ബില്യണ്‍ ദിര്‍ഹം ചെലവില്‍ ഒരുങ്ങുന്ന പുതിയ ടെര്‍മിനല്‍ വഴി പ്രതിവര്‍ഷം 26 കോടി യാത്രക്കാര്‍ക്ക് സഞ്ചരിക്കാന്‍ കഴിയുമെന്നാണ് അധികൃതര്‍ കണക്കുകൂട്ടുന്നത്. 

ദുബൈയുടെ തെക്ക് ഭാഗത്തായി സ്ഥിതി ചെയ്യുന്ന അല്‍മക്തൂം എയര്‍പോര്‍ട്ട് പൂര്‍ണമായും പ്രവര്‍ത്തനസജ്ജമാകുമ്പോള്‍ ഇത് ലോകത്തിലെ ഏറ്റവും വലിയ വിമാനത്താവളമായി മാറും. 

നഗരത്തിന്റെ മധ്യത്തില്‍ സ്ഥിതി ചെയ്യുന്ന ദുബൈ അന്താരാഷ്ട്ര വിമാനത്താവളവുമായി താരതമ്യം ചെയ്യുമ്പോള്‍ അല്‍മക്തൂം വിമാനത്താവളത്തില്‍ എത്തിപ്പെടാന്‍ കൂടുതല്‍ സമയം എടുക്കുമോയെന്ന ആശങ്ക യുഎഇയിലെ നിരവധി പേര്‍ക്കിടയില്‍ ഉണ്ട്.

Dubai International Airport to shut down by 2032 as Al Maktoum International takes over; marks end of an iconic era.