റിയാദ്: ക്രിസ്റ്റ്യാനോ റൊണാള്‍ഡോ അല്‍ നസര്‍ വിടുമെന്ന അഭ്യൂഹങ്ങള്‍ ശക്തമാകുന്നു. സഊദി പ്രോ ലീഗില്‍ കഴിഞ്ഞ ദിവസം നടന്ന മത്സരത്തില്‍ താരം കളിച്ചിരുന്നില്ല. എന്തുകൊണ്ട് താരം കളിച്ചില്ല എന്നതിന് ക്ലബ് ഇതുവരെ വ്യക്തമായ വിശദീകരണം നല്‍കിയിട്ടില്ല. പരിശീലന സെഷനുകളില്‍ പങ്കെടുക്കാത്ത റൊണാള്‍ഡോ മെഡിക്കല്‍ സ്റ്റാഫിന്റെ നിരീക്ഷണത്തിലാണെന്ന് മാത്രമാണ് ഔദ്യോഗികമായി വ്യക്തമാക്കിയിട്ടുള്ളത്.

ലീഗില്‍ ഇനി മൂന്ന് മത്സരങ്ങള്‍ മാത്രമാണ് അല്‍ നസറിന് ബാക്കിയുള്ളത്. ക്രിസ്റ്റ്യാനോ തന്റെ ശാരീരിക ക്ഷമത വീണ്ടെടുത്താല്‍ അടുത്ത മത്സരത്തില്‍ കളിക്കുമെന്ന വാര്‍ത്തകള്‍ പ്രചരിക്കുന്നുണ്ടെങ്കിലും, താരം ക്ലബ് വിടാനുള്ള തയ്യാറെടുപ്പിലാണെന്ന ഊഹങ്ങള്‍ ശക്തമാണ്. 

ഇറ്റാലിയന്‍ പരിശീലകന്‍ സ്റ്റെഫാനോ പിയോലിയുടെ തന്ത്രങ്ങളില്‍ താരം തൃപ്തനല്ലെന്നും, ക്ലബുമായുള്ള കരാര്‍ പുതുക്കുന്നതിന് മുന്‍പ് കോച്ച് പിയോലിയെയും സ്‌പോര്‍ട്ടിംഗ് ഡയറക്ടര്‍ ഫെര്‍ണാണ്ടോ ഹിയേറോയെയും നീക്കം ചെയ്യണമെന്നും റൊണാള്‍ഡോ ആവശ്യപ്പെട്ടതായി വാര്‍ത്തകളുണ്ട്. വന്‍തുക ചെലവഴിച്ച് റൊണാള്‍ഡോയെ ടീമിലെത്തിച്ചെങ്കിലും, അല്‍ നസറിന് ഇതുവരെ ശ്രദ്ധേയമായ ഒരു ട്രോഫിയും നേടാന്‍ കഴിഞ്ഞിട്ടില്ല. ഈ വിഷയത്തില്‍ താരം അസംതൃപ്തനാണെന്നും അറിയുന്നു.

അതേസമയം, ക്രിസ്റ്റ്യാനോയുടെ അഭാവത്തില്‍ അല്‍ നസര്‍ കഴിഞ്ഞ ലീഗ് മത്സരത്തില്‍ അല്‍ അഖ്ദൂദിനെ 9-0 എന്ന സ്‌കോറിന് പരാജയപ്പെടുത്തി. മത്സരത്തില്‍ സാദിയോ മാനെ നാല് ഗോളുകള്‍ നേടി തിളങ്ങി. 74 പോയിന്റുകളോടെ അല്‍ ഇത്തിഹാദ് ഒന്നാം സ്ഥാനത്ത് നില്‍ക്കുമ്പോള്‍ 63 പോയിന്റുകളുള്ള അല്‍ നസര്‍ ലീഗില്‍ മൂന്നാം സ്ഥാനത്താണ്.

Cristiano Ronaldo is reportedly considering leaving Al Nassr unless the club removes manager Stefano Pioli and sporting director Fernando Hierro. The Portuguese superstar, unhappy with the team's tactics and lack of trophies, skipped a crucial Saudi Pro League match amid growing exit rumors.