മഞ്ചേശ്വരം: തീപ്പെട്ടി കമ്പനി ജീവനക്കാരനെ അക്രമിച്ച് പരുക്കേല്‍പ്പിച്ചു. മഞ്ചേശ്വരം റോയല്‍ മാറ്റസ് വര്‍ക്കേഴ്‌സില്‍ ജോലി ചെയ്യുന്ന തമിഴ്‌നാട് കെ എന്‍ പേട്ടിലെ ശേഖരനാണ് (55) ഇരുമ്പ് വടികൊണ്ടുള്ള അടിയേറ്റ് ഗുരുതരമായി പരുക്കേറ്റത്. ഇതേ കമ്പനിയിലെ മറ്റൊരു ജീവനക്കാരന്‍ ഇരുമ്പുവടി കൊണ്ട് ഇയാളെ ആക്രമിക്കുകയായിരുന്നു. കഴിഞ്ഞ ദിവസമാണ് സംഭവം. അക്രമത്തില്‍ ശേഖരന്റെ തുടയെല്ല് തകര്‍ന്നു. ഇതേ കമ്പനിയിലെ മറ്റൊരു ജീവനക്കാരനായ  കോട്ടയം സ്വദേശി രാജുവാണ് ശേഖരനെ ആക്രമിച്ചത്. തീപ്പെട്ടിക്കമ്പനിയിലെ വേറൊരു തൊഴിലാളിയായ കൊല്‍ക്കത്ത സ്വദേശി കൃഷ്ണനെ ജോലിക്കിടെയുണ്ടായ തര്‍ക്കത്തെ തുടര്‍ന്ന് രാജു ഇയാളെ ഭീഷണിപ്പെടുത്തുകയും മര്‍ദിക്കാന്‍ മുതിരുകയും ചെയ്തിരുന്നു. ശേഖരന്‍ ഇതിനെ ചോദ്യം ചെയ്തപ്പോള്‍ പ്രകോപിതനായ രാജു അവിടെയുണ്ടായിരുന്ന ഇരുമ്പുവടിയെടുത്ത് ശേഖരന്റെ ഇരുതുടകളിലും മാറി മാറി അടിക്കുകയായിരുന്നു. തുടയെല്ല് തകര്‍ന്ന ശേഖരനെ പിന്നീട് രാജു തന്നെ കാസര്‍കോട് ജനറല്‍ ആശുപത്രിയിലേക്ക് കൊണ്ട് പോവുകയായിരുന്നു.
ഇതിനിടെ നുള്ളിപ്പാടിയിലെ കടവരാന്തയില്‍ കൊല്ലപ്പെട്ട നിലയില്‍ കണ്ടെത്തിയ യുവാവിന്റെ മൃതദേഹം ഇന്‍ക്വസ്റ്റ് ചെയ്യാനെത്തിയ അഡീഷണല്‍ എസ്. ഐ ആന്റണിയെയും പൊലിസ് സംഘത്തേയും കണ്ട രാജു  തന്നെ  പിടികൂടുമെന്ന് ഭയന്ന് ആശുപത്രിയില്‍ നിന്നും ഇറങ്ങി ഓടി. എന്നാല്‍ രാജു എന്തിനാണ് ഓടിയതെന്ന് പൊലിസിനു മനസ്സിലാകാതെ വന്നതോടെ ആദ്യം ആശുപത്രിയില്‍ നിന്നും കാര്യങ്ങള്‍ ചോദിച്ചു മനസിലാക്കിയ പൊലിസ് സംഘവും ഇയാളുടെ പിറകെ ഓടി കാസര്‍കോട് റയില്‍വേ സ്‌റ്റേഷന്‍ ഭാഗത്തുനിന്നും പിടികൂടുകയായിരുന്നു.