കൊല്ലം: സംസ്ഥാന സര്‍ക്കാരിന്റെ വാര്‍ഷികാഘോഷവേദിയായ ആശ്രാമം മൈതാനത്ത് ഉല്‍പന്നവൈവിധ്യത്തിന്റെ ഒടുങ്ങാത്തനിര. ന്യായവിലയ്ക്ക് ഗുണമേന്‍മയുള്ള ഉല്‍പന്നങ്ങള്‍ വാങ്ങാനുള്ള അവസരം പാഴാക്കാതെ ആയിരങ്ങളാണ് എത്തുന്നതും. 20 വരെ നീളുന്ന മേളയില്‍ സര്‍ക്കാരിന്റെ വിവിധ സേവനങ്ങള്‍ വേഗത്തിലും സൗജന്യമായും നേടിയെടുക്കാനുമുണ്ട് തിരക്ക്. സായാഹ്നങ്ങളിലെ കലാവിരുന്ന് ആസ്വദിക്കാനായി കുടുംബസദസുകള്‍ ഏറുകയുമാണ്.

നൂറോളം സ്റ്റോളുകളിലായി 70 ലധികം ഉല്‍പന്നങ്ങളാണ് വില്‍പനക്കായി സജ്ജീകരിച്ചിട്ടുള്ളത്. കറി പൗഡറുകള്‍, ചക്ക വിഭവങ്ങള്‍, ഭക്ഷ്യോല്‍പന്നങ്ങള്‍, കരകൗശലവസ്തുക്കള്‍, ആഭരണങ്ങള്‍, തുണിത്തരങ്ങള്‍, നിത്യോപയോഗസാധനങ്ങള്‍ തുടങ്ങി വ്യത്യസ്തവും വൈവിധ്യവുമാര്‍ന്ന ഉല്‍പന്നങ്ങളുണ്ട്. കുടുംബശ്രീയുടെ നേതൃത്വത്തില്‍ ബ്രാന്‍ഡ്‌ചെയ്ത ഭക്ഷ്യഉല്‍പ്പന്നങ്ങള്‍, ധാന്യപ്പൊടികള്‍, മൂല്യവര്‍ധിത ഉല്‍പന്നങ്ങള്‍, തുണിത്തരങ്ങള്‍ തുടങ്ങിയവയും.
മുള, പനയോല, തടി, ചിരട്ട, കളിമണ്ണ്, കയര്‍, ലോഹങ്ങള്‍, വൈക്കോല്‍ തുടങ്ങിയവ ഉപയോഗിച്ചുള്ള ഉല്‍പ്പന്നങ്ങളാണ് വിപണനത്തിനുള്ളത്. പ്രമേഹമുള്ളവര്‍ക്കായുള്ള മില്ലറ്റ് കഞ്ഞിക്കുട്ട്, തേന്‍ മൂല്യവര്‍ദ്ധിത ഉല്‍പ്പന്നങ്ങള്‍, തേനീച്ചകൃഷിക്ക് ആവശ്യമായ ഉപകരണങ്ങള്‍, എല്‍ഇഡി ബള്‍ബുകള്‍ തുടങ്ങിയവയും വാങ്ങാം.  നീതി സ്റ്റോറുകളില്‍നിന്ന് നിത്യോപയോഗ സാധനങ്ങളും ലഭിക്കും

തുണി നെയ്ത്ത് നേരില്‍ കാണാം

മേളയില്‍ തുണി നെയ്യുന്നത് തത്സമയം നേരിട്ട് കാണാനും അവസരമുണ്ട്.  ജില്ലാ വ്യവസായകേന്ദ്രത്തിന്റെ സ്റ്റോളിലാണ് തറിയുടെ പ്രവര്‍ത്തനരീതിശാസ്ത്രമറിയാനുള്ള തിരക്ക്. കൈത്തറിയില്‍ നെയ്ത മുണ്ടും കൈലിയും സാരിയും ഷര്‍ട്ടുമെല്ലാം ഇവിടെ നിന്ന് വാങ്ങാം. നെയ്ത്ത് കൂടുതല്‍ പഠിക്കാനും അറിയാനും ആഗ്രഹിക്കുന്നവര്‍ക്ക് മുള്ളുവിളയില്‍ പ്രവര്‍ത്തിക്കുന്ന നെയ്ത്ത് കേന്ദ്രം സന്ദര്‍ശിക്കാനുള്ള അവസരവും നല്‍കും.