തിരുവനന്തപുരം: തിരുവനന്തപുരത്ത് നെടുമങ്ങാട് തേക്കടയില്‍ മകന്‍ മണികണ്ഠന്‍ അമ്മയെ മദ്യലഹരിയില്‍ ചവിട്ടിക്കൊലപ്പെടുത്തി. നെടുമങ്ങാട് സ്വദേശി ഓമന(75)യാണ് കൊല്ലപ്പെട്ടത്. ഇന്നലെ അര്‍ധരാത്രിയോടെയായിരുന്നു സംഭവം. മകനെ വട്ടപ്പാറ പൊലിസ് കസ്റ്റഡിയിലെടുത്തു. വട്ടപ്പാറയിലെ വീട്ടിലാണ് ഓമന താമസിക്കുന്നത് .

മദ്യലഹരിയിലാണ് മകന്‍ കൃത്യം നടത്തിയതെന്നാണ് പൊലിസ് പറയുന്നത്. ഓമനയുടെ ശരീരത്തിലെ എല്ലുകള്‍ പൊട്ടിയിട്ടുണ്ടായിരുന്നു. അമ്മയുമായുണ്ടായ വഴക്കിനിടയില്‍ പ്രകോപിതനായ മകന്‍ അമ്മയെ ചവിട്ടിക്കൊലപ്പെടുത്തുകയായിരുന്നു. നാട്ടുകാര്‍ ഓമനയെ തിരുവനന്തപുരം മെഡിക്കല്‍ കോളജില്‍ എത്തിച്ചെങ്കിലും രക്ഷിക്കാനായില്ല.

വീട്ടില്‍ സ്ഥിരം പ്രശ്‌നങ്ങള്‍ ഉണ്ടാകാറുണ്ടെന്നാണ് നാട്ടുകാര്‍ പറയുന്നത്. മണികണ്ഠന്‍ സ്ഥിരമായി മദ്യപിക്കുന്നതില്‍ ഓമനയ്ക്ക് പ്രശ്‌നങ്ങളുണ്ടായിരുന്നു. ഓമനയുടെ ഏക മകനാണ് ഇയാള്‍.