കൊല്ലം: കൊല്ലം ചിതറയില്‍  യുവാവിനെ അഞ്ചംഗ സംഘം കുത്തിക്കൊന്നു. തുമ്പമണ്‍ സ്വദേശി സുജിന്‍(29) ആണ് കൊല്ലപ്പെട്ടത്. ലഹരി ഉപയോഗിക്കുന്നത് ചോദ്യം ചെയ്തതിലുള്ള വൈരാഗ്യമാണ് കൊലക്ക് കാരണമെന്നാണ് പൊലിസിന്റെ നിഗമനം. സുജിന്റെ സുഹൃത്ത് അനന്തുവിനെയും പ്രതികള്‍ ആക്രമിച്ചു. പ്രതികളെ ചിതറ പൊലിസ് കസ്റ്റഡിയിലെടുത്തു.

തുമ്പമണ്‍ സ്വദേശികളായ വിവേക്, സൂര്യജിത്ത്, ബിജു, മഹി, വിജയ് എന്നിവരെയാണ് കസ്റ്റഡിയിലെടുത്തത്. ചൊവ്വാഴ്ച രാത്രി പത്തരയോടെയാണ് കൊല്ലപ്പെട്ട സുജിനും ലഹരിസംഘവും തമ്മില്‍ ആദ്യം തകര്‍ക്കമുണ്ടായത്. പിന്നീട് ഇവര്‍ പോയെങ്കിലും സുജിനെയും അനന്തുവിനെയും തടഞ്ഞു നിര്‍ത്തി ആക്രമിക്കുകയായിരുന്നു.

നേരത്തേ ഇവര്‍ത മ്മില്‍ തര്‍ക്കങ്ങളുണ്ടായിരുന്നുവെന്നും പൊലിസ് പറയുന്നു. വയറ്റിലേറ്റ ആഴത്തിലുള്ള മുറിവാണ് സുജിന്റെ മരണകാരണമെന്നാണ് ആശുപത്രി അധികൃതര്‍ പറയുന്നത്. പരിക്കേറ്റ അനന്തുവും ചികിത്സയിലാണ്.