ന്യൂഡല്‍ഹി: തുര്‍ക്കിയിലെ ഇസ്താംബുള്‍ കോണ്‍ഗ്രസ് സെന്ററിന്റെ ഓഫിസ് ഇന്ത്യന്‍ നാഷണല്‍ കോണ്‍ഗ്രസിന്റെ (ഐ.എന്‍.സി) ഓഫീസാണെന്ന് വ്യാജ വ്യാജ പ്രചാരണം നടത്തിയ വിവാദ ചാനലായ റിപബ്ലിക് ടിവി മേധാവി അര്‍ണാബ് ഗോസ്വാമിക്കും ബിജെപി ഐടി സെല്‍ മേധാവി അമിത് മാളവ്യയ്ക്കും എതിരേ കേസ്. ഭാരതീയ ന്യായ സംഹിതയുടെ സെക്ഷന്‍ 192 (കലാപമുണ്ടാക്കുകയെന്ന ലക്ഷ്യത്തോടെ മനഃപൂര്‍വ്വം പ്രകോപനം സൃഷ്ടിക്കല്‍), 352 (സമാധാന ലംഘിക്കുകയെന്ന ഉദ്ദേശത്തോടെ മനഃപൂര്‍വ്വം അപമാനിക്കല്‍) എന്നിവ പ്രകാരമാണ് കേസ്. തെറ്റായ വിവരങ്ങള്‍ പ്രചരിപ്പിച്ചുവെന്നാരോപിച്ച് ഇന്ത്യന്‍ യൂത്ത് കോണ്‍ഗ്രസിന്റെ ലീഗല്‍ സെല്‍ മേധാവി ശ്രീകാന്ത് സ്വരൂപ് ബിഎന്‍ ബംഗളൂരു ഹൈഗ്രൗണ്ട്‌സ് പോലീസ് സ്റ്റേഷനില്‍ നല്‍കിയ പരാതിയിലാണ് നടപടി. 

അമിത് മാളവ്യയും അര്‍ണാബ് ഗോസ്വാമിയും തെറ്റായ വിവരങ്ങള്‍ പ്രചരിപ്പിക്കുന്നതിനായി ഹീനവും ക്രിമിനല്‍ ലക്ഷ്യത്തോടെയും പ്രചാരണത്തിന് ആസൂത്രണം ചെയ്‌തെന്ന് പരാതിയില്‍ സ്വരൂപ് ചൂണ്ടിക്കാട്ടി. തുര്‍ക്കിയിലെ ഇസ്താംബുള്‍ കോണ്‍ഗ്രസ് സെന്റര്‍ ഇന്ത്യന്‍ നാഷണല്‍ കോണ്‍ഗ്രസിന്റെ (ഐഎന്‍സി) ഓഫീസാണെന്ന വ്യാജ അവകാശവാദം പ്രതികള്‍ ദുരുദ്ദേശ്യപൂര്‍വ്വം പ്രചരിപ്പിച്ചു. ഇന്ത്യക്കാരെ വഞ്ചിക്കുക, ഇന്ത്യയിലെ മുഖ്യ പ്രതിപക്ഷ പാര്‍ട്ടിയെ അപകീര്‍ത്തിപ്പെടുത്തുക, ദേശീയ വികാരങ്ങള്‍ വൃണപ്പെടുത്തുക, പൊതുജനങ്ങള്‍ക്കിടയില്‍ അശാന്തി വളര്‍ത്തുക, ദേശീയ സുരക്ഷയും ജനാധിപത്യ സമഗ്രതയും തകര്‍ക്കുക എന്നീ വ്യക്തവും നിഷേധിക്കാനാവാത്തതുമായ ക്രിമിനല്‍ ഉദ്ദേശ്യത്തോടെയാണ് ഈ പ്രവൃത്തി നടപ്പാക്കിയതെന്നും അദ്ദേഹം പറഞ്ഞു.

പരാതി അടിയന്തരമായി പരിഗണിക്കണമെന്ന് പ്രസ് കൗണ്‍സില്‍ ഓഫ് ഇന്ത്യ, ഇന്‍ഫര്‍മേഷന്‍ ആന്‍ഡ് ബ്രോഡ്കാസ്റ്റിംഗ് മന്ത്രാലയം, സിബിഐ, മറ്റ് നിയമ നിര്‍വ്വഹണ ഏജന്‍സികള്‍ എന്നിവരോടും സ്വരൂപ് അഭ്യര്‍ത്ഥിച്ചു.

Arnab shows 'Istanbul Congress Center' and claims it to be the Congress office. 🤡 pic.twitter.com/YTlbuvcZTK

— Mohammed Zubair (@zoo_bear) May 19, 2025

ഇന്ത്യ, പാക് പ്രശ്‌നത്തില്‍ പാകിസ്ഥാനൊപ്പം നിലകൊണ്ടതിന്റെ പശ്ചാത്തലത്തില്‍ തുര്‍ക്കിക്കെതിരായ നീക്കങ്ങള്‍ ഉണ്ടാകുന്നതിനിടെയാണ്, കോണ്‍ഗ്രസ് പാര്‍ട്ടിക്ക് തുര്‍ക്കിയില്‍ രജിസ്റ്റര്‍ ചെയ്ത ഓഫീസ് ഉണ്ടെന്ന് ബിജെപി ഐടി സെല്ലും റിപബ്ലിക് ടിവിയും തെറ്റായി പ്രചരിപ്പിച്ചത്. 'പ്രേക്ഷകരേ, കോണ്‍ഗ്രസിന് തുര്‍ക്കിയില്‍ രജിസ്റ്റര്‍ ചെയ്ത ഓഫീസ് ഉണ്ടെന്ന് നിങ്ങള്‍ക്കറിയാമോ? തുര്‍ക്കിയില്‍ കോണ്‍ഗ്രസിന് എന്ത് തരത്തിലുള്ള ബിസിനസ്സാണുള്ളത്? എന്ന് ചോദിച്ചായിരുന്നു തെറ്റായ വാര്‍ത്ത പ്രചരിപ്പിച്ചത്. പിന്നാലെ തന്നെ ഫാക്ട് ചെക്ക് വെബ്‌സൈറ്റ് മേധാവി മുഹമ്മദ് സുബൈര്‍ ഈ തെറ്റായ അവകാശവാദം പെട്ടെന്ന് തന്നെ പൊളിച്ചെഴുതി.

വാര്‍ത്തയില്‍ പരാമര്‍ശിച്ച ഇസ്താംബുള്‍ കോണ്‍ഗ്രസ് സെന്റര്‍ ഒരു കണ്‍വെന്‍ഷന്‍ സെന്ററാണെന്ന് സുബൈര്‍ വെളിപ്പെടുത്തിയിരുന്നു. തെറ്റായ വിവരങ്ങള്‍ പ്രചരിപ്പിച്ചതിന് റിപ്പബ്ലിക്ക് ടിവി മാപ്പപേക്ഷിച്ചെങ്കിലും യൂത്ത് കോണ്‍ഗ്രസ് പരാതിയുമായി മുന്നോട്ടുപോകുകയയിരുന്നു. ഡിജിറ്റല്‍ ഡെസ്‌കിലെ ഒരു വീഡിയോ എഡിറ്റര്‍ തുര്‍ക്കിയിലെ കോണ്‍ഗ്രസ് ഓഫീസായി തെറ്റായി ചിത്രീകരിക്കുന്ന ഒരു ചിത്രം അബദ്ധവശാല്‍ ഉപയോഗിച്ചെന്നായിരുന്നു വിശദീകരണം. പിശകില്‍ ഞങ്ങള്‍ ആത്മാര്‍ത്ഥമായും നിരുപാധികമായും ഖേദിക്കുന്നുവെന്നും റിപ്പബ്ലിക്ക് ടിവി സോഷ്യല്‍ മീഡിയയില്‍ പങ്കുവെച്ച പോസ്റ്റില്‍ പറഞ്ഞിരുന്നു. 

FIR filed against BJP IT cell chief, journalist Arnab Goswami. Case was registered based on the complaint from the Indian Youth Congress's legal cell head.