തിരുവനന്തപുരം: തിരുവനന്തപുരത്ത് പൊലിസ് സ്റ്റേഷനില്‍ ദളിത് യുവതി അപമാനിക്കപ്പെട്ട സംഭവത്തില്‍ ഒരു പൊലിസ് ഉദ്യോഗസ്ഥനെതിരെ കൂടി നടപടി. സംഭവ ദിവസം സ്റ്റേഷനിലെ ജി.ഡി ചുമതലയുണ്ടായിരുന്ന എ.എസ്.ഐ പ്രസന്നനെതിരെയാണ് നടപടി. ഇയാളെ സസ്പെന്‍ഡ് ചെയ്തതായി ബന്ധപ്പെട്ടവര്‍ അറിയിച്ചു. 

ബിന്ദുവിനോട് ശുചിമുറിയില്‍ നിന്ന് വെള്ളം കുടിക്കാന്‍ പറഞ്ഞത് പ്രസന്നനായിരുന്നു. കന്റോണ്‍മെന്റ് അസിസ്റ്റന്റ് കമ്മീഷണറുടെ റിപ്പോര്‍ട്ടിനെ തുടര്‍ന്നാണ് ഇയാള്‍ക്കെതിരെ നടപടിയെടുത്തിരിക്കുന്നത്. 

ദലിത് യുവതിക്ക് അപമാനമേല്‍ക്കേണ്ടി വന്ന പരാതി അന്വേഷിച്ച് റിപ്പോര്‍ട്ട് നല്‍കാന്‍ തിരുവനന്തപുരം സിറ്റി പൊലിസ് മേധാവിയോട് നിര്‍ദേശിച്ചതായി വനിതാ കമ്മിഷന്‍ അധ്യക്ഷ പി. സതീദേവി കഴിഞ്ഞ ദിവസം അറിയിച്ചിരുന്നു. ഇവരുടെ കുടുംബത്തെക്കൂടി അപമാനിക്കുന്ന അന്തരീക്ഷമുണ്ടായി. എല്ലാ കാര്യങ്ങളും വസ്തുനിഷ്ഠമായി അന്വേഷിച്ച് കുറ്റവാളികളെ നിയമത്തിന് മുന്നില്‍ കൊണ്ടുവരും. മാതാപിതാക്കള്‍ തമ്മിലുള്ള പക കുട്ടികളോട് തീര്‍ക്കുന്ന പ്രവണതയെക്കുറിച്ച് ഗൗരവമായ പഠനം വേണമെന്നും സതീദേവി മാധ്യമങ്ങളോട് പറഞ്ഞു.

ബിന്ദു ജോലിക്ക് നിന്ന വീട്ടില്‍നിന്ന് സ്വര്‍ണ്ണമാല കാണാനില്ലെന്ന് വീട്ടുടമ പരാതി നല്‍കിയതിനെ തുടര്‍ന്നാണ് ബിന്ദുവിനെ പൊലിസ് സ്റ്റേഷനിലേക്ക് എത്തിക്കുന്നത്. പേരൂര്‍ക്കട പൊലിസ് സ്റ്റേഷനില്‍ എത്തിച്ച് എസ് ഐ ഉള്‍പ്പടെയുള്ളവര്‍ ബിന്ദുവിനോട് ക്രൂരമായി പെരുമാറി. ഒരു ദിവസം സ്റ്റേഷനില്‍ പട്ടിണിക്കിട്ടു. കുടിക്കാന്‍ വെള്ളം പോലും നല്‍കിയില്ല. കള്ളന്മാരെ പോലെ നാട്ടിലെത്തിച്ച് തെളിവെടുപ്പ് നടത്തി. താന്‍ മോഷണം നടത്തിയിട്ടില്ലെന്ന് കരഞ്ഞു പറഞ്ഞിട്ടും കേള്‍ക്കാന്‍ തയ്യാറായില്ലെന്നും ബിന്ദു പറഞ്ഞിരുന്നു.