ന്യൂഡൽഹി: 2029-ൽ ‘ഒരു രാഷ്ട്രം, ഒരു തിരഞ്ഞെടുപ്പ്’ പദ്ധതി നടപ്പാക്കാൻ തിരഞ്ഞെടുപ്പ് കമ്മീഷനും കേന്ദ്ര സർക്കാരും ഒരുങ്ങുന്നു. ലോക്സഭ, നിയമസഭ തിരഞ്ഞെടുപ്പുകൾ ഒരേസമയം നടത്തുന്നതിന് 5,300 കോടി രൂപയോളം ചെലവ് വരുമെന്നാണ് തിരഞ്ഞെടുപ്പ് കമ്മീഷന്റെ  വിലയിരുത്തൽ. 48 ലക്ഷം ബാലറ്റിംഗ് യൂണിറ്റുകൾ, 35 ലക്ഷം കൺട്രോൾ യൂണിറ്റുകൾ, 34 ലക്ഷം വിവിപാറ്റുകൾ എന്നിവ വേണ്ടിവരും.

നിലവിൽ 30 ലക്ഷം ബാലറ്റിംഗ് യൂണിറ്റുകൾ, 24 ലക്ഷം വിവിപാറ്റുകൾ, 22 ലക്ഷം കൺട്രോൾ യൂണിറ്റുകൾ എന്നിവ മാത്രമാണ് ലഭ്യമായുള്ളത്. 2013-14ൽ ഉപയോഗിച്ച വോട്ടിംഗ് യന്ത്രങ്ങൾ 2029-ൽ ഉപയോഗിക്കാനാവില്ല. അതിനാൽ, 20 ലക്ഷം ബാലറ്റിംഗ് യൂണിറ്റുകൾ, 10 ലക്ഷം വിവിപാറ്റുകൾ, 13 ലക്ഷം കൺട്രോൾ യൂണിറ്റുകൾ എന്നിവ അധികമായി ആവശ്യമാണ്. തകരാറുള്ളവ മാറ്റിനൽകാൻ റിസർവ് യൂണിറ്റുകളും വേണ്ടിവരും. 2024-ൽ 10.53 ലക്ഷം പോളിംഗ് ബൂത്തുകൾ ഉണ്ടായിരുന്നത് 2029-ൽ 12.1 ലക്ഷമായി ഉയരുമെന്നാണ് കണക്ക്.

ഒരേസമയം തിരഞ്ഞെടുപ്പ് നടത്തുമ്പോൾ ദീർഘകാലാടിസ്ഥാനത്തിൽ ചെലവ് കുറയുമെങ്കിലും, ആദ്യഘട്ടത്തിൽ വോട്ടിംഗ് യന്ത്രങ്ങൾ, വിവിപാറ്റുകൾ, സംഭരണ സൗകര്യങ്ങൾ എന്നിവയ്ക്ക് വൻതുക ചെലവഴിക്കേണ്ടിവരും. ഇവിഎം വിതരണം, സംഭരണം, ലോജിസ്റ്റിക്സ്, മനുഷ്യശക്തി എന്നിവയുമായി ബന്ധപ്പെട്ട വെല്ലുവിളികൾ പരിഹരിക്കാൻ തിരഞ്ഞെടുപ്പ് കമ്മീഷൻ ശ്രമിക്കുന്നു. ഈ പദ്ധതി സംബന്ധിച്ച് രൂപീകരിച്ച സംയുക്ത പാർലമെന്ററി കമ്മിറ്റി പാർലമെന്റിന്റെ മഴക്കാല സമ്മേളനത്തിൽ റിപ്പോർട്ട് സമർപ്പിക്കും.