ഇസ്‌ലാമാബാദ്: പാകിസ്താനില്‍ സ്‌കൂള്‍ ബസിലുണ്ടായ ബോംബ് സ്‌ഫോടനത്തില്‍ നാല് കുട്ടികള്‍ മരിച്ചു. ബലൂചിസ്ഥാന്‍ പ്രവിശ്യയിലാണ് സ്‌കൂള്‍ ബസില്‍ ഉഗ്രസ്‌ഫോടനം നടന്നത്. സംഭവത്തില്‍ 38 പേര്‍ക്ക് പരിക്കേറ്റതായാണ് റിപ്പോര്‍ട്ട്. 

സ്‌ഫോടനത്തിന്റെ ഉത്തരവാദിത്വം ആരും ഏറ്റെടുത്തിട്ടില്ല. പിന്നില്‍ ബലൂച് ലിബറേഷന്‍ ആര്‍മിയാണെന്ന് സ്ഥിരീകരിക്കാത്ത റിപ്പോര്‍ട്ടുകളുണ്ട്. ആക്രമണത്തെ പാകിസ്താന്‍ ആഭ്യന്തര മന്ത്രി മൊഹ്‌സിന്‍ നഖ്‌വി അപലപിച്ചു. 

ബലൂചിസ്താന്‍ പ്രവിശ്യയില്‍ ഖുസ്ദാര്‍ ജില്ലയിലാണ് അപകടമുണ്ടായത്. കുട്ടികളെ സ്‌കൂളിലേക്ക് കൊണ്ടുപോകുന്നതിനിടെയാണ് ആക്രമണം നടന്നതെന്ന് പ്രാദേശിക ഡെപ്യൂട്ടി കമ്മീഷണര്‍ യാസില്‍ ഇഖ്ബാല്‍ പറഞ്ഞു. 

നേരത്തെ മെയ് 19ന് അഫ്ഗാനിസ്ഥാന്‍ അതിര്‍ത്തി പങ്കിടുന്ന ബലൂചിസ്താന്‍ പ്രവിശ്യയിലെ ഖില്ല അബ്ദുള്ള നഗരത്തിലെ മാര്‍ക്കറ്റിന് സമീപം കാര്‍ ബോംബ് ആക്രമണം നടന്നിരുന്നു. അന്ന് നാലുപേരാണ് സ്‌ഫോടനത്തില്‍ കൊല്ലപ്പെട്ടത്. പിന്നാലെയാണ് ദിവസങ്ങള്‍ക്ക് ശേഷം പുതിയ ആക്രമണം.