പാലക്കാട്: സംസ്ഥാനത്ത് കുട്ടികൾക്കെതിരായ അതിക്രമങ്ങൾ പെരുകുന്നു. ക്രൈം റെക്കോഡ്‌സ് ബ്യൂറോയുടെ കണക്കുപ്രകാരം സംസ്ഥാനത്ത് ഈ വർഷം മാർച്ച് വരെ കുട്ടികൾക്കെതിരായ അതിക്രമങ്ങളുമായി ബന്ധപ്പെട്ട് 1,352 കേസുകളാണ് രജിസ്റ്റർ ചെയ്തത്. കൊലപാതകം - അഞ്ച്, തട്ടിക്കൊണ്ടുപോകൽ - 41, ബാലവിവാഹം - മൂന്ന്, മറ്റ് കുറ്റകൃത്യങ്ങൾ എന്നിവ ഉൾപ്പെടെയാണ് 1,352 കേസുകൾ രജിസ്റ്റർ ചെയ്തത്. ഏപ്രിൽ, മെയ് മാസങ്ങളിലെ കണക്കുകൂടി ഉൾപ്പെടുത്തിയാൽ കുറ്റകൃത്യങ്ങളുടെ എണ്ണം ഇനിയും ഉയരും. 2024ൽ കൊലപാതകം - 23, തട്ടിക്കൊണ്ടുപോകൽ - 112, ബാലവിവാഹം - 10, മറ്റ് കുറ്റകൃത്യങ്ങൾ എന്നിവ ഉൾപ്പെടെ 5,140 കേസുകളാണ് ആകെ രജിസ്റ്റർ ചെയ്തിരുന്നത്. 

പോക്‌സോ (പ്രൊട്ടക്ഷൻ ഓഫ് ചിൽഡ്രൻ ഫ്രം സെക്ഷ്വൽ ഒഫൻസസ്) ആക്ട് പ്രകാരം സംസ്ഥാനത്ത് ഈ വർഷം മാർച്ച് വര 1,201 കേസുകളാണ് രജിസ്റ്റർ ചെയ്തത്. തിരുവനന്തപുരം ജില്ലയിലാണ് കൂടുതൽ കേസുകൾ. തിരുവനന്തപുരം സിറ്റി പരിധിയിൽ 68 കേസുകളും റൂറൽ പരിധിയിൽ 106 കേസുകളും ഉൾപ്പെടെ 174 കേസുകളാണ് മൂന്നുമാസത്തിനുള്ളിൽ രജിസ്റ്റർ ചെയ്തത്. ഏറ്റവും കുറവ് കേസുകൾ ഇടുക്കി ജില്ലയിലാണ് (51). 2024ൽ സംസ്ഥാനത്ത് ആകെ രജിസ്റ്റർ ചെയ്ത പോക്‌സോ കേസുകളുടെ എണ്ണം 4,594 ആയിരുന്നു. കഴിഞ്ഞവർഷവും തിരുവനന്തപുരം ജില്ലയിലായിരുന്നു കൂടുതൽ കേസുകൾ. ഏറ്റവും കുറവ് കാസർകോട് ജില്ലയിലും. കുട്ടികൾക്കെതിരായുള്ള ലൈംഗികാതിക്രമ കേസുകളിൽ പ്രതിസ്ഥാനത്ത് കൂടുതലും ബന്ധുക്കളും കുടുംബാഗങ്ങളുമാണെന്നതാണ് ഞെട്ടിക്കുന്ന വസ്തുത.