തിരുവനന്തപുരം: സർക്കാർ ഉദ്യോഗസ്ഥർക്കിടയിൽ അഴിമതിക്കാരുടെ 'സ്ലീപ്പർ സെൽ' ഉണ്ടെന്ന് വിജിലൻസ് കണ്ടെത്തൽ. 
സംസ്ഥാന വിജിലൻസിന്റെ പക്കൽ അഴിമതിക്കാരായ ഉദ്യോഗസ്ഥരുടെ പട്ടികയുണ്ട്. അനുദിനം ഈ പട്ടിക പുതുക്കുന്നുമുണ്ട്. എന്നാൽ, ചില മേഖലകളിൽ അഴിമതി നടക്കുന്നതായി വിവരം ലഭിച്ചിട്ടും കുറ്റക്കാരെ കണ്ടെത്താനാകാതെ വന്നതോടെയാണ് ഉദ്യോഗസ്ഥർക്കിടയിൽ അഴിമതിക്കാരുടെ സ്ലീപ്പർ സെൽ പ്രവർത്തിക്കുന്നുണ്ടെന്ന അനുമാനത്തിലേക്ക് വിജിലൻസ് എത്തിയത്. രഹസ്യാന്വേഷണത്തിൽ അത് സ്ഥിരീകരിക്കുകയും ചെയ്തു. വിജിലൻസിന്റെ പട്ടികയിൽ ഇല്ലാത്തവർ അഴിമതി നടത്തുന്നത് ശ്രദ്ധയിൽപ്പെട്ടതോടെയാണ് സ്ലീപ്പർ സെൽ ഉണ്ടെന്ന തീരുമാനത്തിലേക്ക് വിജിലൻസ് എത്തിയത്.

അഴിമതി നടക്കുന്ന ഓഫിസുകൾ സംബന്ധിച്ച് പൊതുപ്രവർത്തകരിൽ നിന്നും ജനപ്രതിനിധികളിൽ നിന്നും വിവരങ്ങൾ ശേഖരിക്കുന്നത് കൂടാതെ ഓൺലൈനായും ഫോൺ കോൾ വഴിയും വിജിലൻസിന് രഹസ്യവിവരങ്ങൾ ലഭിക്കുന്നുണ്ട്. പ്രാരംഭാന്വേഷണങ്ങളിൽ പരാതികളിലധികവും വൈരാഗ്യബുദ്ധിയുടെ ഭാഗമായുള്ളതാണെന്ന് കണ്ടെത്തി ഉപേക്ഷിക്കുകയാണ് പതിവ്. കാര്യഗൗരവമുള്ള പരാതികളെ രണ്ടാംഘട്ട അന്വേഷണത്തിലേക്ക് പരിഗണിക്കുന്നു. വിജിലൻസിന്റെ രഹസ്യാന്വേഷണ വിഭാഗമാണ്  വിവരശേഖരണം നടത്തുന്നത്. ഇത്തരത്തിൽ ഒഴിവാക്കപ്പെടുന്ന പരാതികളിൽ കൂടുതൽ ശ്രദ്ധിക്കാനാണ് ഇപ്പോൾ തീരുമാനം. ഉദ്യോഗസ്ഥർക്കെതിരേ അഴിമതി പരാതി ഉയർന്നിട്ടും രഹസ്യാന്വേഷണത്തിൽ തെളിവുകൾ കണ്ടെത്താനാകാതെ വന്നതോടെയാണ് ഇവർ സ്ലീപ്പർ സെല്ലുകളാണെന്ന അനുമാനത്തിൽ വിജിലൻസ് എത്തിച്ചേർന്നത്.

സർക്കാർ സർവിസിൽ നിന്ന് അഴിമതി പൂർണമായി തുടച്ചുനീക്കുന്നതിന്റെ ഭാഗമായാണ് വിജിലൻസ് നടപടികൾ ശക്തമാക്കിയിരിക്കുന്നത്. വിജിലൻസ് ഡയരക്ടറായി മനോജ് ഏബ്രഹാം അടുത്തിടെ ചുമതലയേറ്റിരുന്നു. ഇതിനുപിന്നാലെയാണ് നടപടികൾ കടുപ്പിച്ചത്. കഴിഞ്ഞദിവസം അഴിമതിക്കാരായ അഞ്ച് ഉദ്യോഗസ്ഥരാണ് വിജിലൻസ് പിടിയിലായത്. പതിനായിരം രൂപ കൈക്കൂലി വാങ്ങുമ്പോൾ വയനാട് മുട്ടിൽ കെ.എസ്.ഇ.ബി ഓവർസിയർ ചെല്ലപ്പൻ, ഇ.ഡി കേസിൽ നിന്ന് രക്ഷപ്പെടുത്താനെന്ന പേരിൽ രണ്ട് ലക്ഷം രൂപ തട്ടിയെടുത്ത എറണാകുളം തമ്മനം സ്വദേശി വിൽസണും സഹായികളായ രാജസ്ഥാൻ സ്വദേശി മുകേഷ് കുമാർ, കൊച്ചി വാരിയം റോഡ് സ്വദേശിയായ ചാർട്ടേഡ് അക്കൗണ്ടന്റ് രഞ്ജിത്ത് വാര്യർ, ഒരുലക്ഷം രൂപ കൈക്കൂലി വാങ്ങിയ വടകര പാക്കയിൽ ജെ.ബി യു.പി സ്‌കൂളിലെ പ്രധാനാധ്യാപകൻ ഇ.വി രവീന്ദ്രൻ എന്നിവരാണ് വിജിലൻസിന്റെ കെണിയിൽ കുടുങ്ങിയത്.

അഴിമതിക്കാരായ ഉദ്യോഗസ്ഥരുടെ പട്ടികയിലേക്ക് പുതുതായി കണ്ടെത്തുന്നവരെയും ചേർക്കുകയാണ് ആദ്യ പടി. ഇതിനുപിന്നാലെ രഹസ്യാന്വേഷണവും നടത്തും. വിവിധ വകുപ്പുകളിലെ മേലുദ്യോഗസ്ഥർ ഉദ്യോഗസ്ഥർക്ക് ജാഗ്രതാ നിർദേശം നൽകിയിട്ടുണ്ടെന്നാണ് വിവരം. സർക്കാർ ഉദ്യോഗസ്ഥരുടെ അഴിമതി സംബന്ധിച്ച വിവരങ്ങൾ 1064 എന്ന ടോൾ ഫ്രീ നമ്പറിലൂടെ ജനങ്ങൾക്ക് അറിയിക്കാവുന്നതാണ്. 8592900900 എന്ന ഫോൺ നമ്പറിലും അറിയിക്കാം. വാട്‌സ് ആപ്പിൽ 9447789100 എന്ന നമ്പരിൽ സന്ദേശമായും വിവരങ്ങൾ കൈമാറാം.